Reagon opozita ndaj arrestimit të ish-qeveritarit të saj të lartë dje në pushtet, ish-ministrit Spiro Ksera. Sekretar i përgjithshëm i PD-së, Arben Ristani tha se nuk ka asnjë pengesë për hetim ndaj zyrtarëve të akuzuar për korrupsion, qofshin ato nga cili krah.
“Partia Demokratike mbështet dhe inkurajon çdo hetim dhe akt të drejtësisë në luftën kundër korrupsionit. Partia Demokratike nuk bëhet pengesë e asnjë hetimi ndaj zyrtarëve apo ish-zyrtarëve të saj në asnjë rast dhe e vlerëson luftën ndaj korrupsionit si jetike për vendin”, tha Ristani.
Por nga ana tjetër, numri 2 i PD-së, kërkoi që Prokuroria të hetojë me profesionalizëm duke zbatuar vetëm ligjin, por la të nënkuptuar se kjo mund të jetë dhe një lojë politike e kryeministrit Rama, sipas tij, kampion i korrupsionit.
“Ne inkurajojmë hetime të drejta dhe objektive, të pandikuara nga politika dhe veçanërisht nga nevoja që ka qeveria dhe kryeministri më i korruptuar në Ballkan, për të larguar vëmendjen nga hajdutëria masive që po bëjnë çdo ditë, në dogana, tatime, tendera, koncesione dhe privatizime”, theksoi Ristani. /tesheshi.com/
