Një ish-zyrtar i lartë i qeverisë amerikane është arrestuar pasi u filmua duke e quajtur një shitës ushqimesh hallall në New York si “terrorist” dhe duke thënë se vdekja e 4000 fëmijëve palestinezë në Gaza “nuk mjaftonin”.
Stuart Seldowitz, 64 vjeç, ish-zëvendësdrejtor i Zyrës së Departamentit të Shtetit për Çështjet e Izraelit dhe Palestinës, u arrestua të mërkurën me akuzat për ngacmim të rëndë, përndjekje si krim urrejtjeje, përndjekje për të shkaktuar frikë dhe përndjekje në vendin e punës.
“Viktima 24-vjeçare ka treguar në polici se një person i është afruar disa herë në vendin e tij të punës dhe disa herë në data të ndryshme ka bërë deklarata anti-muslimane, gjë që i ka shkaktuar viktimës një ndjenjë frike dhe zemërimi”, sipas policisë.
Këtë muaj, një video e debateve të shumta mbi luftën e Izraelit në Gaza midis Seldowitz dhe një egjiptiani që shiste ushqim hallall nga një karrocë në Manhatan u bë virale.
“Nëse do të vrisnim 4000 fëmijë palestinezë, nuk do të mjaftonte”, thotë Seldowitz në një video të postuar në platformën X.
Shitësi mund të shihet duke i thënë Seldowitz-it “shko, shko, shko, shko” dhe “Unë nuk do ta dëgjoj atë”. Seldowitz më pas përgjigjet: “Por ti je terrorist. Ju mbështesni terrorizmin.”
Në video të tjera, Seldowitz shpifte për Profetin Muhamed dhe e quajti shitësin “injorante” se nuk fliste rrjedhshëm anglisht. Ai kërcënon gjithashtu se do të përdorë lidhjet e tij me qeverinë për të mobilizuar policinë sekrete të Egjiptit kundër shitësve.
“Mukhabarat (agjencia e inteligjencës) në Egjipt do të kapë prindërit tuaj. A i pëlqen babait thonjtë e tij? Do i nxjerrin një nga një”, thotë duke buzëqeshur ish-diplomati.
Seldowitz ishte ushtrues detyre i drejtorit të Këshillit të Sigurisë Kombëtare të Drejtorisë së Azisë Jugore në administratën e ish-presidentit Barack Obama. Ai gjithashtu shërbeu si zyrtar i lartë i politikës në Zyrën e Departamentit të Shtetit për Çështjet e Izraelit dhe Palestinës.
Mijëra shprehën mbështetjen e tyre për shitësin
Ai tha për lajmet e televizionit lokal para arrestimit të tij të mërkurën se video nuk e transmetonte historinë e plotë dhe se ai u mërzit pasi burri shprehu simpatinë për grupin palestinez Hamas – megjithëse asnjë video nuk tregon shitësin që përmend grupin që sundon Gazën.
Pasi pamjet e komenteve të Seldowitz u bënë virale, njujorkezët u mblodhën për të mbështetur shitësin, duke u rreshtuar për të blerë pulë dhe oriz nga karrocat e ushqimit në Upper East Side të Manhatanit të martën. /tesheshi.com/
