Familja Lesi në Rrasfik të Mirditës ka hapur dyert vetëm për ngushëlluesit. Siç e do dhe zakoni, me lajmin e arrestimit të djalit të tyre, gjithë fshatarët, të afërmit shkojnë pinë kafen.
Gazetarët mbahen larg, sepse nëna e vrasësit të gruas është e sëmurë. I vetmi person që duket se mban ende peshën e rëndë të ngjarjes dhe atë të komunikimit me botën e jashtme, është i vëllai i 34-vjeçarit.
Ai lutet t’i lënë të qetë. Përreth shtëpisë ku është rritur Klodi Lesi, i cili për 20 ditë ishte personi më i kërkuar në Greqi, dëgjohen vetëm të lehura qeni. Fshati është braktisur me kohë. Të rinjtë janë larguar, një ndër ta që mori rrugën e mërgimit ishte dhe Lesi.
Banorët e mbetur në Rasfik janë në dijeni për historinë. Që nga martesa me greken, lindja e dy fëmijëve, divorci dhe ankesat e të riut pse nuk e linin të takohej me të vegjëlit. Por në zonë askush nuk flet për atë që ka ndodhur në Greqi. Kështu e do rregulli për të mos u përzjerë me punët e tjetrit. /tesheshi.com/
