Pas arrestimit të liderit të AAK-së, Ramush Haradinaj në Slloveni, ka reaguar Këshilli i Lartë i Mbrojtjes së të Drejtave të Njeriut. Ky institucion e ka cilësuar si diskriminues dhe jo të dinjitetshëm arrestimin e Haradinaj dhe trajtimin e tij në Slloveni.
KLMDNJ shprehet se kryetari i AAK-së z. Ramush Haradinaj, është politikani i radhës që u arrestua në Slloveni, mbështetur në një kërkesë të Serbisë në vitin 2004 drejtuar Interpolit e cila nuk u shfuqizua deri më sot ndonëse z. Haradinaj kishte fituar pafajësinë para Tribunalit të Hagës në një proces gjyqësorë ku edhe Serbia kishte ofruar dëshmi kundër tij.
Para z.Haradinaj ishin ndaluar dhe arrestuar edhe Agim Çeku, Hashim Thaçi, Fatmir Limaj dhe disa ish luftëtarë të UÇK-së të cilët për muaj të tërë ishin mbajtur nën arrest e që pastaj ishin liruar në mungesë të provave.
KMDLNJ vlerëson se z. Haradinaj padrejtësisht është arrestuar dhe ndaluar në Slloveni në bazë të një urdhër-arresti nga Serbia dhe për këtë mbajnë përgjegjësi autoritetet sllovene që kanë ndalur mbi vendimet e Tribunalit të Hagës, të cilin e kanë pranuar të gjitha shtetet e BE-së dhe të cilat nuk e kanë penguar z. Haradinaj gjatë hyrjes apo vizitave në ato shtete për çka autoritetet sllovene janë të informuara.
“Është paradoks që një kryetar partie dhe njëherësh deputet i Kuvendit të Kosovës të trajtohet në atë mënyrë. Trajtimi i z. Haradinaj dhe politikanëve të tjerë kosovarë që ishin arrestuar më parë është një fakt se si trajtohet Kosova në planin ndërkombëtar”- thuhet në deklaratën e KLMDNJ.
Mëtejshtohet se autoritetet sllovene janë të informuara shumë mirë se ç’ka ka ndodhur në hapësirat e ish-Jugosllavisë dhe ku është adresa e përgjegjësisë sepse edhe vet Sllovenia e ka pësuar nga fabrikuesi i aktakuzave e që është Serbia.
“Ky është paradoks i llojit të vet prandaj autoritetet sllovene kanë për detyrim t’i kërkojnë falje publike z. Haradinaj sikur që edhe autoritetet kosovare duhet të jenë më të vendosura për lirimin dhe kthimin e z. Haradinaj në Kosovë. Ndonëse është liruar z. Haradinaj i mohohet një e drejtë elementare e njeriut e ajo është liria e lëvizjes, të cilën e ka të mohuar nga autoritetet sllovene dhe Serbia”- përfundon KLMDNJ. /tesheshi.com/
