Ministrit serb të Mbrojtjes, Aleksandar Vulin i është ndaluar hyrja në Kosovë për të marrë pjesë në festën e Vidovdanit në Gazimestan të Fushë Kosovës.
Mirëpo nëse Vulin tenton të hyjë në territorin e Kosovës pa leje, organet e rendit do ta zbatojnë ligjin, pra do ta arrestojnë siç vepruan me Marko Gjuriçin muaj më parë. Të paktën një paralajmërim të tillë e ka bërë Jetlir Zyberaj, këshilltar i ministrit të Punëve të Jashtme, Behxhet Pacolli.
Ai, përmes një postimi në Facebook ka thënë se secili provokim që mund të bëhet, pasojat do t’i bartë Beogradi.
“Secili provokim që mund të bëhet, pasojat do ti bartë Beogradi ngase provokime te tilla i bën qëllimshëm. Partnerët ndërkombëtarë janë të njoftuar për secilin veprim tonin. Përtej konspiracioneve qe rëndom prodhohen pastaj, është shumë e qartë se futja ilegale e kujtdo ne territorin e Kosovës, nënkupton zbatim te ligjit nga policia e Kosovës”, shkruan Zyberaj.
Reagon Beogradi: vendimi skandaloz…
Për ndalimin e Vulinit ka reaguar Zyra për Kosovën në qeverinë e Serbisë e cila e ka quajtur vendimin skandaloz.
Sipas kumtesës që e publikon FoNet, kjo Zyrë e ka fajësuar edhe Bashkimin Europain për ndalimin e kësaj vizite.
“Është e qartë se ky vendim është marrë në koordinimin ndërmjet Kosovës dhe Shërbimit Europian për Punë të Jashtme me qëllim që të nënçmohet Serbia”, thotë kumtesa e Zyrës.
Ky vendim, shtohet në kumtesë, vjen pas pranimit të Kosovës në takimin e Brukselit se përkrah marrëveshjet e arritura deri më tash dhe se sillet si palë e rëndësishme dhe e respektueshme ndal palës me të cilën dëshiron marrëveshje.
Vizita e Vulinit, thotë kumtesa, është paralajmëruar në përputhje me procedurat e rregullta dhe moslejim i saj, vlerësohet, është shkelje shumë e rëndë Marrëveshjes për vizata e zyrtarëve garantues i të cilave është mu Bashkimi Europian.
“Është e papranueshme mësimi i nga disa shtete se çfarë duhet të thonë zyrtarë serbë për Ditën e Vidovdanit”, thuhet në kumtesë.
Kujtojmë se policia e Kosovës për festën religjioze ortodokse të Vidovdanit, e cila festohet sot, përmes hartimit të planit operativ, ka ndërmarrë të gjitha masat e nevojshme për mbajtjen e rendit dhe sigurisë publike, zbatueshmërinë e ligjit në vend, si dhe shtimin e masave të sigurisë për të garantuar rend, qetësi dhe siguri publike, para, gjatë dhe pas manifestimeve. /tesheshi.com/
