Ende pa nisur dita, kreu i PD-së Lulzim Basha ka dalë me një deklaratë për shtyp duke kërkuar as më pak e as më shumë, por arrestimin e ish-kreut të Rendit, Sajmir Tahiri, kjo pas arrestimit në Itali të një Habili (Moisiut), i akuzuar për trafik ndërkombëtar droge.
Basha tha se prej vitesh e muajsh, faktori ndërkombëtar i kanë vënë në dispozicion kryeministrit Rama të dhëna që faktojnë përfshirjen e Tahirit në trafikun e drogës mes Shqipërisë dhe Italisë, por që shefi i qeverisë i ka injoruar.
“Rama e ka mbrojtur ministrin e tij dhe tani e ka promovuar koordinator të qeverisjes me qytetarët. Ne e dimë se provat për përfshirjen e Tahirit do të bëhen publike, ne e dimë se prej kohësh ato janë në duart e Edi Ramës. Pyetja që shtrohet është çfarë pret Rama t’i vërë prangat dhe ta ekstradojë, në mos ta gjykojë këtu Tahirin, si një nga kapitenët e drogës?”, tha Basha.
Sipas këtij të fundit, gjithçka është bërë me vetëdije të plotë, pasi paratë e drogës janë përdorur në zgjedhjet e 2017-s.
Deklarata për shtyp e Bashës mëngjesin e kësaj të marte, mund të jetë më e hershmja në kontekstin kohor të një dite, mbajtur në historinë e politikës shqiptare nën pluralizëm. /tesheshi.com/
