Disa arrestime të fundit në kuadër të operacionit “Forca e Ligjit” ndodhur në Shkodër, ministri Xhafaj i ka veçuar si një tjetër sukses në luftë kundër krimit. Në një mesazh të fundit të tij, pasaardhësi i Saimir Tahirit për pak sa nuk ka artikuluar thënien e famshme të këtij të fundit, “Bravo çuna”, teksa ka komplimentuar vartësit e tij.
“Tjetër ndëshkim në kuadrin e operacionit “Forca e Ligjit”: një nga 3 grupet kriminale të identifikuara në qarkun Shkodër. Përkushtim&profesionalizëm, sukses i merituar i policisë Shkodër&Forcave operacionale. Bashkëpunim efikas me prokuroren e çështjes. Përgëzime te gjithëve!FLM!”, shkruan Xhafaj.
Por ndërkohë, nga të arrrestuarit e fundit prej “Forcës së Ligjit”, si në Fier e si në Shkodër, asnjë prej tyre nuk përbën ndonjë emër të bujshëm në rang kombëtar, ose që të lidhet me ndonjë ngjarjë të bujshme kriminale. Mjaft që ende nuk kanë rënë në pranga vrasësit e Lushnjës, ngjarja e ndodhur më shumë se një muaj më parë me dy viktima në mes të qytetit. Edhe pse ministri Xhafaj ishte vetë në Lushnje për t’i mobilizuar vartësit e tij, rezultati deri më tani është zero. /tesheshi.com/
