Policia në Spanjë dhe Itali arrestoi 11 persona dhe sekuestroi më shumë se pesë tonë vaj ulliri të falsifikuar që do të hidheshin në treg.
U sekuestruan edhe 91,000 euro në para të gatshme dhe katër automjete, ndërsa autoritetet ngrinë llogaritë bankare
Hetimet u kryen nga policia spanjolle në bashkëpunim me karabinierët italianë dhe Europol. Në të dy vendet u kryen bastisje si dhe kontrolle të kooperativave në tre provinca spanjolle.
Dyshimet u ngritën nga policia spanjolle kur u zbuluan parregullsi gjatë kontrollit të një kamioni që transportonte vaj ulliri. Kështu, u arrit në evidentimin e një afere të dyfishtë në Spanjë dhe Itali që synonte shpërndarjen e vajit të ullirit të falsifikuar në tregun botëror.
Një kompani në Spanjë blinte vaj ulliri me cilësi më të ulët dhe e tregtonte duke e paraqitur si të virgjër ose ekstra të virgjër, duke falsifikuar dokumente. Një veprim të ngjashëm ka ndërmarrë një kompani në Itali, raporton Guardian.
Çmimet e larta, prodhimi i reduktuar i vajit të ullirit dhe kërkesa në rritje krijojnë “tokën e përsosur” për mashtrime të tilla, thotë Europol.
Çmimet e vajit të ullirit janë rritur në të gjithë Evropën pasi thatësira dhe kushtet e tjera të pafavorshme të motit ndikojnë në të korrat për të dytin vit radhazi. Prodhimi botëror pritet të bjerë në 2.4 milion ton, më pak se të korrat e vitit të kaluar dhe shumë më pak se kërkesa globale prej rreth tre milion ton.
Kështu që së paku, konsumatori shqiptar t’i drejtohet prodhimit vendas. /tesheshi.com/
