Pak ditë pasi SPAK ka çuar pas hekurave dhëndërin e Berishës, Jamambër Malltezin, lidhur me një aferë të përfolur në privatizimin e ish-klubit Partizani, kreu i kësaj prokurorie Altin Dumani po zhvillon një vizitë në SHBA së bashku me vartës të tij. Ai është takuar me Ndihmës Sekretarin Amerikan për Çështjet Evropiane dhe Euroaziatike, Jim’o Brien, si dhe me ish-ambasadoren Yuri Kim, gruan që u investua edhe personalisht në ngritjen e SPAK-ut, duke i dhënë status amerikan si një instancë e cila do revolucionalizonte drejtësinë në Shqipëeri, duke mbyllur epokën e mosndëshkimit të sferave të larta të krimit dhe politikës.
Ka qenë Jim’o Brien, i cili ka shpërndarë një foto të takimit në X, duke përcjellë dhe mesazhin e fortë mbështetës.
“I kënaqur që takova shefin e SPAK-ut, Altin Dumanin. Është mbresëlënëse të shohësh reformën në drejtësi që jep rezultate reale për popullin shqiptar, duke treguar me veprime se askush nuk është mbi ligjin. SHBA do të vazhdojë të mbështesë fuqishëm reformën në drejtësi, e cila është thelbësore për të ardhmen e Shqipërisë”, shkruan Jim’o Brien.
Opozita po e akuzon SPAK si urdhëmarrëse nga qeveria, në rastet kur ajo po shënjestron personazhe të saj, por deri më tani ka çuar pas hekurave më shumë personazhe të mazhorancës, ndërkohë që nga brenda kësaj instance thuhet se Rama ka zero ndikim, pasi gjithçka është nën monitorim e rreptë të SHBA-së. /tesheshi.com/
