Çiklisti gjerman Arnold Fiek ka qenë me shumë fat këtë të dielë, kur gara e tij mund të ishte kthyer në tragjedi.
22-vjeçari që pedalon për skuadrën Christina Jewelry mori pjesë në Çmimin e Madh të Luganos. Shiu i rrëmbyeshëm e kishte bërë rrugën tepër të rrëshqitshme, e për shkak të kësaj Fiek do të humbiste kontrollin në një urë, duke rënë poshtë saj.
“U përpoqa të kapesha në parmakët, por nuk mundesha,” tregon çiklisti.
Më pas ai ka rënë nga një lartësi 12 metra në ujë, në liqenin e Luganos. Ka notuar për pesë metra e është
ngjitur në një mur betoni, ku ka pritur t’i vijnë në ndihmë.
“Isha shumë me fat. Po të kisha rënë me kokë nuk do të kishte qenë aq mirë.”
“Në momentin e parë në ujë mendova se gjithçka mori fund,” ka rrëfyer Arnold Fiek.
Çiklisti profesionist ia ka hedhur me një këllk të thyer e me lëndime të vogla, duke shpresuar që pas gjashtë javësh të jetë përsëri duke i dhënë biçikletës. /tesheshi.com/
