Nga Blendi Gashi
Presidenti Thaçi po merr kundërshtime të ashpra nga opozita, përfshirë dhe dhe dikur miq të tij të ngushtë, për të qenë kryenegociator i bisedimeve me Serbinë, si dhe për idenë e korrigjimit të kufirit me shtetin serb. Por në këto ditë të “vështira” për të, ai ka marrë përkrahjen e një prej kundërshtarëve më të mëdhenj të viteve të pasluftës, të ish-kryekuvendarit Nexhat Daci që aktualisht mban postin e kryetarit të Akademisë së Shkencave dhe të Arteve të Kosovës.
Daci më 30 korrik, në një intervistë dhënë për “Klan Kosova” ai doli hapur pro Thaçit duke thënë se është i pakontestueshëm si kryenegociator, ndërsa sulmoi ish-partinë e tij LDK-në duke thënë se nuk i kupton pse e kundërshtojnë kur vet e kanë bërë president.
Kjo deklaratë siç duket i ka dhënë force Thaçit i cili më 1 gusht trokiti në derën e Dacit dhe u takua me të në vilën e ish-kryekuvendarit në Brezovicë ku biseduan për tema të mëdha, veçanërisht dialogun me Serbinë e ku presidenti ja shpalosi edhe idenë e korrigjimit të kufirit me Serbinë.
“Kryeakademikun Daci e informova për ecurinë e dialogut ndërmjet Kosovës dhe Serbisë. Ishte konstatim i përbashkët se në këtë proces të gjithë duhet të marrim përgjegjësi: institucionet, partitë politike parlamentare, opozita, shoqëria civile, Akademia etj. Vetëm të bashkuar mund t’i realizojmë objektivat tona: njohjen reciproke Kosovë Serbi, ulësen në OKB si dhe anëtarësimin në të gjitha organizatat tjera ndërkombëtare. Pretendimi i Serbisë për ndarje të Kosovës gjithmonë do të jetë i papranueshëm, por në kuadër të korrigjimit të kufijve duhet të shtrohet, në procesin e dialogut, tanimë kërkesa dhe e drejta e Luginës së Preshevës për t’iu bashkuar Kosovës”, shkruan Thaçi në Facebook.
Se Thaçi është lider i pakontestueshëm e Daci e ka thënë në një intervistë për tesheshi.com edhe në tetor të 2015-tës.
“Mund të mos e duam dhe respektojmë por unë merrem me vlerësime që janë të kapshme. Dhe e kam thënë: pas presidentit Rugova lideri më i fuqishëm është Thaçi”, ka thënë Daci.
Po si ishin raportet mes Thaçit e Dacit pasluftës?
Ndërsa takimi mes tyre u konsiderua i shkëlqyer, vlen të theksohet se dy personat në fjalë paslufte kanë qenë ndër armiqtë më të mëdhenj, dhe këtë e dëshmon ajo që kishte ndodhur në seancën e parë të Kuvendit të Kosovës kur Daci u zgjodh kryetar.
Është pikërisht Thaçi njeriu që fyejti më së rëndi Dacin gjatë gjithë jetës së tij. Këtë e ka thënë vet Daci.
“Unë jam rritë pa prind dhe për herë të parë me është sharë nëna nga Hashim Thaçi në seancën e parë të Kuvendit të Kosovës”, ka thënë Daci.
Pas kësaj miqësie, pyetjet që shtrohen janë: pse dhe si erdhi kjo miqësi mes Thaçit e Dacit? Pse e fali Daci për fyerjen që ja bëri dhe pse po e përkrah kaq shumë tani? Apo thjesht, Daci si politikan i moçëm ka lënë pas hatërmbetjen dhe po e thotë atë që me të vërtetë beson, pra që Thaçi pas Rugovës mbetet i pakonkurrencë në skenën politike. /tesheshi.com/
