Presidenti malazez Milo Gjukanoviç do të zhvillojë të premten një vizitë pune në Republikën e Turqisë, ku po udhëton me ftesë të presidentit turk Rexhep Tajip Erdogan.
Drejtoria e Komunikimit e Presidencës së Turqisë njoftoi se Erdogan do të presë kolegun e tij malazez Gjukanoviç në Stamboll, raporton Anadolia.
Në njoftimin për shtyp thuhet se Erdogan dhe Gjukanoviç do të diskutojnë për aspekte të ndryshme të marrëdhënieve mes Turqisë dhe Malit të Zi, si dhe për mundësitë e përmirësimit të bashkëpunimit dypalësh.
Në takim do të diskutohen edhe një sërë temash të rëndësishme rajonale, në radhë të parë për situatën në Ballkan.
Në fund të majit, dy presidentët patën një bisedë telefonike për marrëdhëniet mes dy vendeve dhe situatën në Ballkan, gjatë së cilës Erdogan e ftoi Gjukanoviçin të vizitojë Turqinë.
Kujtojmë që presidenti malazez është ndër kundërshtarët më të ashpër të regjimit të Beogradit dhe shumë në Serbi, si nga politika ashtu dhe nga Kisha, e shohin atë si armik. /tesheshi.com/
