Një marrëveshje mes SHBA-ve dhe Rusisë ka bërë të mundur një armëpushim në Halep, aty ku ka bombardime e luftime prej javësh.
Armëpushimi ka nisur të mërkurën, ndërkohë që atë e ka pohuar dhe ushtria siriane, duke deklaruar se do të ketë një “regjim qetësie” në Halep gjatë 48 orëve.
Marrëveshja është arritur të martën vonë, por njoftimi është shtyrë për të parë fillimisht zbatimin në terren.
Zëvendëszëdhënësi i Departamentit të Shtetit, Mark Toner, e përshkroi optimiste situatën pas hyrjes në fuqi të armëpushimit, “Kemi parë një rënie të përgjithshme të dhunës në këto zona, edhe pse ka raportime për luftime që vazhdojnë në disa vende.”
Toner deklaroi se armëpushimi do të mbikëqyret nga afër. “Sulmet kundër popullsisë civile të Sirisë nuk mund të justifikohen kurrë, dhe duhet të ndalojnë menjëherë.”
Ndërprerja e luftimeve në Halep pason armëpushimin në rrethinat e Damaskut dhe në Latakia.
Halepi ka qenë prej dy javësh objektivi kryesor i ushtrisë së regjimit sirian. Rreth 300 njerëz kanë humbur jetën prej bombardimeve dhe luftimeve, ku nuk janë kursyer as spitalet dhe zonat e banuara. /tesheshi.com/
