Edhe pse Këshilli i Sigurimit të OKB-së miratoi në mënyrë unanime rezolutën për vendosjen e armëpushimit 30-ditor në Siri, në periferitë e Damaskut që mbahen nga kryengritësit ka pasur sërish sulme ajrore. Armëpushimi 30-ditor synonte dërgimin e ndihmave në këto zona dhe evakuiimin e njerëzve të plagosur.
Sidoqoftë, disa nga grupet më të mëdha kryengritëse nuk përfshihen në marrëveshje, duke ngritur dyshime për ndikimin e vërtetë që do të ketë armëpushimi në jetën e civilëve të goditur nga konflikti.
Aktivistët thanë se sulmet ajrore nisën në Guta menjëherë pas votimit në Nju Jork. Rezoluta pati vonesa disa herë për shkak se anëtarët e Këshillit të Sigurimit nuk po arrinin në marrëveshje.
Rreth 500 persona thuhet se janë vrarë nga forcat qeveritare në enklavë që prej nisjes së sulmeve ajrore të dielën e kaluar.
Ndërkaq, armëpushimi duket se nuk është kuptuar njësoj nga vendet e përfshira në çështjen siriane. Kështu, Irani dhe Siria do të vazhdojnë sulmet mbi periferitë e Damaskut që mbahen nga “terroristët”, por diku tjetër respektojnë një rezolutë të Kombeve të Bashkuara duke kërkuar një armëpushim 30-ditor në të gjithë Sirinë. Kështu deklaroi shefi i stafit ushtarak iranian këtë të dielë.
“Ne do t’i përmbahemi rezolutës së armëpushimit, Siria gjithashtu do të përmbahet. Pjesët e periferisë së Damaskut, të cilat mbahen nga terroristët, nuk mbulohen nga armëpushimi dhe operacionet do të vazhdojnë aty,” tha gjenerali Mohammad Baqeri, cituar nga agjencia e lajmeve “Tasnim”. /tesheshi.com/
