Halepi do të mund të përjetojë dhe tre ditë të tjera pak më të qeta, ndërsa Ministria ruse e Mbrojtjes njoftoi për zgjatjen e armëpushimit.
Një armëpushim i arritur pas marrëveshjes mes Rusisë dhe SHBA-ve e që synon frenimin e përkeqësimit të situatës në provincën e Halepit.
Armëpushimi do të deklarohej fillimisht të mërkurën nga ushtria siriane, pas dy javësh luftimesh e bombardimesh që u morën jetën 300 civilëve.
Departamenti i Shtetit e ka konfirmuar nëpërmjet zëdhënësit zgjatjen e armëpushimit.
John Kirby ka deklaruar se, “Ndërsa e mirëpresim këtë zgjatje të fundit (të armëpushimit), synimi ynë është të arrijmë në pikën kur nuk do na duhet më të llogarisim orët, e që ndërprerja e luftimeve të respektohet plotësisht në tërë Sirinë.”
Kirby ka vënë në pah dhe angazhimin amerikan për të patur një armëpushim sa më të gjatë, “Ndëprerja e luftimeve e ka zvogëluar dhunën në Halep. Shtetet e Bashkuara janë të angazhuara ta mbajnë atë sa më gjatë të jetë e mundur në fuqi.”
Pavarësisht qetësimit të përgjithshëm të gjendjes, ka patur shkëmbime zjarri sporadike në pjesë të ndryshme të provincës në veriperëndim të Sirisë. Luftimet e dy javëve të shkuara në Halep kanë qenë më të ashprat në më shumë se një vit. /tesheshi.com/
