Pas dështimit të marrëveshjes për nisjen e evakuimit të civilëve dhe kryengritësve të mërkurën në lindje të Halepit, një rreze drite është shfaqur në horizont.
Grupet kryengritëse siriane kanë deklaruar se është arritur një tjetër marrëveshje armëpushimi. Sipas tyre, kjo marrëveshje ka hyrë në fuqi në orët e para të së enjtes, dhe evakuimi do të nisë po sot.
Agjencia e lajmeve Reuters citon këtë mëngjes një burim zyrtar sirian që thotë se ka nisur tashmë operacioni për organizimin e largimit të luftëtarëve nga pjesa lindore e Halepit.
Nga një tjetër burim, nga Observatori Sirian për të Drejtat e Njeriut, deklarohet se autokolona e parë me njerëz të plagosur kishte nisur të lëvizte nga pjesa lindore në atë perëndimore të qytetit.
Arritjen e armëpushimit e lajmëroi sot dhe një organ mediatik i Hezbullahut libanez, që lufton në krah të Beshar Esadit. Nga ky organ u bë e ditur se luftëtarët e opozitës do të lejoheshin t’i linin zonat e rrethuara të Halepit.
Marrëveshja e re parashikon dhe evakuimin e menjëhershëm nga dy fshatrat e rrethuar nga kryengritësit në veriperëndim të Sirisë. Qeveria siriane dhe Irani e kishin kushtëzuar evakuimin nga lindja e Halepit me evakuimin nga këto fshatra.
Largimi i civilëve dhe kryengritësve nga pjesa lindore e Halepit qe parashikuar të kryhej dje; prishja e marrëveshjes të ndërmjetësuar nga Turqia e Rusia u shoqërua me rinisjen e sulmeve ajrore mbi territorin e rrethuar. /tesheshi.com/
