Vazhdon fushata e ethshme e anglezëve të Mançester Junajtedit për t’u kthyer në elitën e futbollit, qoftë në nivel kombëtar e në atë ndërkombëtar.
Pas nënshkrimit me një prej trajnerëve më të mirë në botë, me atë ashtuquajturin “Special One”, Jose Mourinho-n, e me Zlatan Ibrahimovic-in, ish-sulmuesin e PSG-së, i ka ardhur radha një tjetër blerjeje.
Një marrëveshje katërvjeçare sjell në “Old Trafford” kapitenin e Armenisë, që sapo ka lënë Borusian e Dortmundit në Gjermani. Henrikh Mkhitaryan do të veshë bluzën e Mançester Junajtedit, një transferim i dëshiruar shumë prej tij.
“Eshtë një ëndërr e bërë realitet për mua,” ka deklaruar 27-vjeçari, të cilin deri tani e kishim parë të spikaste në Bundesligë.
“Jam i entuziazmuar që do të luaj për një klub me një histori të tillë të shkëlqyer, e shpresoj të jem pjesë e tij për një kohë të gjatë.”
Mkhitaryan do të linte Shakhtarin e Donjekut tre vite të shkuara, për të kaluar te Borusia e Dortmundit. Ai do të bënte 140 paraqitje për skuadrën gjermane, e do të shënonte 41 gola.
“Jam i kënaqur që ai ka zgjedhur të luajë për Junajtedin,” është shprehur Mourinho për faqen elektronike të klubit anglez.
“Besoj se ai do të ketë shumë shpejt ndikim në ekip, pasi stili i tij i lojës i përshtatet Premier League-s,” ka shtuar portugezi.
Henrikh Mkhitaryan është golashënuesi më i mirë i përfaqësueses armene në të gjithë historinë e saj, me 19 gola të shënuar në 59 takime. /tesheshi.com/
