Nga Blendi Gashi
“Vezët politike” të markës VV u rikthyen dje në luftën guerrile të politikës kosovare, kur ato u lëshuan sërish drejt kryeministrit Isa Mustafa, gjatë një vizite në Podujeë. Por ndërkohë, mungoi përgjigja flakë për flakë me gotë qelqi, e realizuar javë më parë nga deputeti i LDK-së, Tahir Zemaj.
Por kush është ai, i cili u bë shkak që në parlament të futen gota plastike për të zëvëndësuar ato të qelqit?
Gjuajti me gotë qelqi në drejtim të deputetëve të opozitës dhe “fshehu” dorën. Kjo ndodhi pasi paraprakisht partitë opozitare gjuajtën me vezë kryeministrin Isa Mustafa.
Deputetit të LDK-së, Armend Zemajt i janë dashur plotë 13 ditë për të pranuar publikisht se ka qenë ai që gjuajti me gotë qelqi kolegët nga opozita.
Mjeti i përdorur nga Zemaj është padyshim tejet më e rrezikshme se “vezët opozitare”.
Zemaj, pasi pranoi se ‘shënjestroi’ opozitën, deklaroi se i vjen keq që gota që ka gjuajtur është thyer dhe nuk ka arritur cakun, duke mos treguar se cili ishte caku.
Ai gjestin e tij e quajti kundërpërgjigje ndaj opozitës, duke e vlerësuar si akt demokratik.
Por, deputetja e ‘Vetëvendosjes’, Albulena Haxhiu e ka quajtur tinëzar deputetin Zemaj, duke thënë se ai duhet ndjekur penalisht pasi ka rrezikuar jetën e deputetëve.
Përplasja me ‘shefin’
Armend Zemaj, me profesion jurist që nga viti 2010 është zgjedhur deputet i Lidhjes Demokratike të Kosovës.
Nuk njihet si deputet i skandaleve, por si një ligjvënës që ka ngritur zërin në vazhdimësi në Parlament, edhe në kohën kur ka qenë partia e tij në opozitë por edhe si pozitë.
Mospajtime kishte edhe me ‘shefin’, e tij të partisë, Isa Mustafa. Kjo ka ndodhur në një seancë plenare të Kuvendit ku debasohej për çështjen e ndërtimit të memorialit në Koshare.
Derisa Zemaj kishte kërkuar që të shtohen paratë për ndërtimin e këtij memoriali, kryeministri Mustafa kshte thënë se nuk e “jep studimin e fizibilitetit të rrugës Gjilan – Prishtinë për një memorial”. Por, ndaj ‘shefit’, të tij ka reaguar sërish Zemaj, i cili pati deklaruar se në projektbuxhet, askund nuk përmendet ky studim fizibiliteti për këtë rrugë.
‘Përplasjet’ e Zemajt me rivalët politikë
Deputeti i LDK-së ka patur edhe momente përplasjesh me rivalë politikë.
Kjo ka ndodhur në një seancë plenare të Kuvendit, ku ai ka debatuar ashpër me kolegen e tij, deputeten Ganimete Musliu. Kjo e fundit deklaroi se partia e Zemajt (LDK) tash e 17 vite ka mbledhur dëshmi të rrejshme kundër UÇK-së.
I menjëhershëm ishte reagimi i deputetit Zemaj, i cili tha se në Kosovë ka ende njerëz me mendësi të mykur dhe të ndikuar nga grupet kriminale. Ai shtoi dhe tjetrën, që UÇK nuk mbetet pronë e rrugaçëve dhe hajnave e bijve të Rankoviqit.
Një tjetër përplasje që mbahet e Zemajt ishte edhe ajo në emisionin “Interaktiv” të KTV-së me Blerand Stavilecin e PDK-së. Ky i fundit e quajti LDK-në parti të “komunistave, Dzurindave”, derisa Zemaj vazhdimisht e kishte kundërshtuar atë.
Deputeti Zemaj u deklarua edhe për vrasjen e xhaxhait të tij, ish-komandantit të UÇK-së, Tahir Zemaj, pasi që ish-deputeti Gani Geci kishte thënë se Armendi është në dijeni se kush ia ka vrarë njeriun e familjes.
Në profilin e tij në Facebook, Armend Zemaj shkruajti se ish-deputeti Gani Geci ia kishte dhënë një CD ku dëgjohet një bisedë telefonike mes Ganiut dhe një të burgosuri në botën jashtë të quajtur Brahim, ku përfolen disa raste kriminale, por kishte mohuar se posedon informacione të sakta për vrasjet e xhaxhait të tij, kolonelit Tahir Zemajt.
Pra, ka gjuajtur me gotë, por jo pak dhe me fjalë.
/tesheshi.com/
