Muajin e ardhshëm, një anëtar i qeverisë “Rama 2” zhvillojw vizitën e parë zyrtare me ftesë të dministratës së Donald Trump-it. Bëhet fjalë për ministren e Mbrojtjes Olta Xhaçka, e cila do të vizitojë Pentagonin e ftuar nga homologu i saj amerikan, gjenerali James Mattis.
Mattis dhe Xhaçka u takuan para disa ditësh në samitin ministerial të NATO-s që u zhvillua në Bruksel, ku dhe u konfirmua vizita zyrtare e ministres shqiptare të Mbrojtjes.
Ushtria amerikane ka marrë përsipër që të modernizojë Forcat e Armatosura Shqiptare me pajisje logjistike luftarake për këmbësorinë dhe Forcat Speciale Operacionale. Një pjesë e kësaj ndihme ka mbërritur dhe pritet që ajo të shtohet në muajt në vazhdim.
Kohët e fundit Ballkani po kthehet në një depozitë të madhe armatimi, si pasojë e vendimit të qeverisë serbe për të blerë një arsenal të madh armësh strategjike nga Rusia dhe Bjellorusia.
Vetëm dje Beogradi konfirmoi shtesën e armatimit me një numër helikopterësh anti-tank që do t’i blejë një Bjellorusi. Serbia ka marrë ndërkohë një numër të konsiderueshëm avionësh gjuajtës bombardues Mig 29 dhe pritet të mbërrijnë në Beograd disa bateri sistemesh raketore S300 me rreze të mesme veprimi.
Ky shtim i armëve ruse në kufi të zonës së NATO-s natyrisht ka shqetësuar SHBA-në e cila i ka kërkuar Beogradit të mos qëndrojë në dy karrike. Kroacia nga ana e saj ka bërë gati blerjen e sistemeve raketore amerikane dhe disa armëve të artilerisë nga ana e ushtrisë së SHBA-së.
Ushtria shqiptare po rinovon thuajse totalisht arsenalin e saj rus dhe kinez të saj. Këmbësoria shqiptare nuk mban më armën që nuk e ka hequr që nga viti 1945, të famshmen Ak47- kallashnikovin rus. Armë të prodhimit turk dhe italian do të shërbejnë si pajisje luftarake të Forcave të Armatosura shqiptare.
Gjithashtu e gjithë flota e MIG-ëve është hequr nga qarkullimi dhe është shkrirë shumica e tankeve T20. Lëvizshmëria luftarake e ushtrisë po zëvendësohet nga pajisje të blinduara amerikane.
Forcat ajrore shqiptare nuk janë të pajisura me avionë gjuajtës por vetëm me helikopterë francez të kompanisë Eurocopter, helikopterë Sar franko-gjermanë, si dhe një kontigjent me helikopterë italianë Augusta që u falën nga qeveria italiane para 10 vjetësh.
Ndërkaq, në bisedimet që pritet të zhvillohen në Pentagon, do të flitet edhe për vazhdimin e armatosjes së ushtrisë afgane me armë dhe municion nga Shqipëria, pjesë e arsenalit të dalë nga përdorimi.
Dy vjet më parë, një parti prej 10 mijë kallashnikovësh janë dërguar në Kabul si donacion i ushtrisë shqiptare.
Ndërkaq, në vitin 2014, ushtria shqiptare ka dërguar një sasi të madhe armatimi dhe municioni për kurdët peshmergë në Irak. Bëhet fjalë për 22 mijë fishekë kallashnikovi, 15 mijë granada dore dhe 32 mijë predha artilerie.
Kurdët peshmergë ishin pjesë e koalicionit amerikan në luftën ndaj ISIS-it në pjesën veri të Irakut, në një pjesë të gjerë që kufizohet me tre shtete: Iranin, Sirinë dhe Turqinë.
Kurdët peshmergë që janë krahu i armatosur i Partisë Demokratike të Kurdistanit, dyshohet se tashmë po bashkëpunojnë me YPG-në në Siri, e po përplasen me forcat turke në Afrin.
Dhe prej vitit 2016 nuk kanë shkuar më armë shqiptare drejt kurdëve. /tesheshi.com/
