Nga Musa Mustafa
Arma me të cilën dyshohet se është vrarë doganieri lituanez i EULEX-it, Audrius Senavicius, në vitin 2013 në afërsi të Zveçanit, dyshohet se e njëjta e përdorur para 17 viteve në rastin e vrasje së të rinjve serbë në kafiterin Panda në Pejë. Informacionin e përcjellë për tesheshi.com një burim kofidencial nga misioni evropian në Kosovë, EULEX.
Por sipas burimit, deri më tani nuk ka shumë informacione se si ka arrituar që pushka e cila ka qenë në duar të Shërbimit Sekret Serb (BIA), të hyjë në veriun e Kosovës e të përdorët për vrasjen e doganierit në vendin e quajtur Ballaban të Komunës së Zveçanit.
Në pyetjen e portalit tesheshi.com, se a bëhet fjalë për pushkën e njëjtë apo për modelin e njëjtë të armës, burimi ka sqaruar se “sipas shenjave të gishtërinjve, mundemi ta identifikojmë personin dhe në bazë të gjilpërës goditëse mundemi ta identifikojmë edhe pushkën”.
“Në bazë të ekspertizës, është e njëjta pushkë që ka vrarë edhe gjashtë të rinjtë serbe në Pejë; e po kjo armë dyshohet se është përdorur edhe në rastin e vrasjes së doganierit të EULEX-it në veriun e Kosovës në vitin 2013”, ka thënë burimi.
Deri më tanim sipas burimeve të portalit tesheshi.com, në lidhje me vrasjen e doganierit lituanez, policia e EULEX-it ka intervistuar si të dyshuar katër serbë nga veriu i Kosovës, nga pjesa e Kollashinit.
Ata dyshohet se janë të lidhur direkt me vrasjen e doganierit, por që e kanë hedhur poshtë fajësinë.
EULEX-i, me qëllim të zbardhjes së vrasjes së doganierit të vet, Audrius Senavicius, ka vënë 30 mijë euro shpërblim për çdo informacion që do marrë që do çonte në kapjen e autorëve.
Audrius Senavicius, doganier lituanez, ishte viktimë e 19 shtatorit 2013, i cili vdiq pas të shtënave në njërën prej dy automjeteve të EULEX-it, që po ecnin përgjatë rrugës për në pikën kufitare G1 në Jarinje të Leposaviqit.
Po ashtu në vitin 2011, polici kosovar Enver Zymberi, e pësoi me jetë duke u qëlluar nga një grup serbësh me armë automatike gjatë aksionit të Policisë së Kosovës për marrjen e kontrollit ndaj pikëkalimeve kufitare me Serbinë.
Deri më tani për këto dy vrasje, atë të policit të Kosovës dhe të doganierit të EULEX-it, askush nuk është denuar; edhe pse janë zhvilluar disa seanca gjyqësore ndaj disa të dyshuarve për vrasjen e Enver Zymberit, të cilët më pas janë shpallur të pafajshëm dhe janë liruar. /tesheshi.com/
