Një thesar me vlerë të madhe arkeologjike u fsheh në rrënojat me baltë të një banje të lashtë në San Cassiano dei Bani, një qytet në provincën e Sienës, rreth 160 km larg kryeqytetit italian.
Arkeologët italianë kanë zbuluar 24 statuja bronzi të ruajtura bukur, që besohet se datojnë midis shekujve II dhe I para Krishtit. Statujat që përshkruajnë Hygeinë, Apollonin dhe hyjnitë e tjera greko-romake u krijuan në një kohë ndryshimesh të mëdha për Toskanën e Lashtë, më konkretisht gjatë kalimit nga sundimi etrusk në atë të Perandorisë Romake.
Disa ekspertë italianë po flasin për një zbulim jashtëzakonisht të rëndësishëm, ku njëri prej tyre thekson se ai “mund të rishkruajë historinë” e rajonit.
Shumica e statujave u gjetën të varrosura nën vaske së bashku me rreth 6000 monedha bronzi, argjendi dhe ari.
Jacopo Taboli, një profesor në Universitetin e Sienës për Studentët e Huaj, i cili drejton gërmimin, beson se statujat janë zhytur në ujërat termale në një formë rituali. “Ju i ofroni diçka ujit duke shpresuar se edhe ai do t’ju ndihmojë,” tregon ai.
Statujat do të transferohen në një punëtori të posaçme konservimi në Grosseto dhe pas disa kohësh ato do të fillojnë të ekspozohen në një muze të ri në San Cassiano.
Sipas Massimo Osana, drejtor i përgjithshëm i muzeve shtetërore të Italisë, zbulimi arkeologjik në Cassiano është më i rëndësishmi që nga Luftëtarët e Riace dhe “sigurisht një nga zbulimet më të rëndësishme të antikiteteve prej bronzi në historinë e Mesdheut të Lashtë”. /tesheshi.com/
