Arkeologët pritet të zbulojnë përgjigjen për një dilemë 200-vjeçare mbi mbetjet e një gjenerali francez që vdiq gjatë betejës së Napoleonit në Rusi.
Charles Etienne Gudin u godit nga një top në betejën e Valutinos më 19 gusht pranë Smolensk, një qytet në perëndim të Moskës afër kufirit me Bjellorusinë.
Këmba e tij u këput dhe ai vdiq tre ditë më vonë nga gangrena, në moshën 44 vjeç. Ushtria Franceze ia mori zemrën, e cila tani ndodhet në varrezat Pere Lachaise në Paris. Pjesa tjetër e mbetjeve nuk u bë kurrë e njohur, derisa studiuesit gjetën një skelet që mund të jetë i tij.
“Sapo pashë skeletin me vetëm një këmbë, e dija që gjetëm njeriun tonë”, thotë kreu i ekipit franko-rus që zbuloi mbetjet në korrik.
Analiza gjenetike po kryhet për të konfirmuar identitetin, duke përdorur ADN-në nga një prej pasardhësve të gjeneralit.
Gudin thuhet se ka qenë një nga gjeneralët e preferuar të Napoleonit dhe të dy burrat ndoqën shkollën ushtarake së bashku. Emri i tij është gdhendur në monumentin Arc de Triomphe në Paris.
Më pak se 10 përqind e ushtrisë franceze shpëtuan nga kjo disfatë. /tesheshi.com/
