Nga Blendi Gashi
Projektligji për marrëveshjen e demarkacionit pritet të hidhet në votim të mërkurën, por koalicioni qeverisës ende nuk i ka votat për ta miratuar atë. Këtë e ka konfirmuar edhe vet zv.kryeministri Behgjet Pacolli i cili për më tepër nuk pret që kjo marrëveshje të kalojë së paku edhe dy javë.
Sytë janë tek Vetëvendosje, por kjo parti ka deklaruar se nuk e voton. Të njëjin qëndrim ka shprehur dhe Lista Serbe. Por përkundër kësaj, kryekuvendari Kadri Veseli shpreson se mund të rrjedhin vota nga këto parti dhe Demarkacioni të ratifikohet.
Megjithatë Veseli dhe Haradinaj pritet të kenë probleme brenda vet grupeve të tyre parlamentare pasi deputetë të caktuar kanë paralajmëruar votën kundër.
Eshtë deputeti i PDK-së, Nait Hasani i cili së fundmi qartë ka bërë të ditur se nuk e voton Demarakcionin. Këtë e ka konfirmuar gjatë vizitës që i ka bërë Cakorrit.
Se nuk e votojnë Demarkacionin nëse raporti “Bulliqi” nuk përfshihet në ligj, kanë deklaruar edhe dy deputetët e AAK-së, Rasim Selmanaj e Teuta Haxhiu, por këta të fundi edhe mund të ndryshojnë qëndrim.
Sipas deklarimeve zyrtare të partive dhe deputetëve të caktuar, koalicioni qeverisës ka rreth 77 vota, pra i duhen gjithësejt edhe 3 vota për kalimin e Demarkacionit. Por nëse llogaritet se dy deputetët e AAK-së e japin votën pro, atëherë nevojitet edhe një votë.
Partia e parë, Vetëvendosje e cila në Kuvend përfaqësohet me 32 deputetë, ka deklaruar se do votojë kundër.
Por janë 27 vota të LDK-së, 22 të PDK-së pasi që deputeti Nait Hasani ka deklaruar votën kundër, AAK-së 10 vota (minus 2 nëse veç e mbajnë fjalë Teuta Haxhiu e Rasim Selmanaj se nuk do ta votojnë Demarkacionin), 6 të NISMA-s, 6 të grupit parlamentar 6 plus dhe 6 vota të deputetëve pa grup parlamentar.
Kurse kundër janë shprehur 32 deputetë të Vetëvendosjes, 10 të Listës Serbe, një deputet i PDK-së dhe dy të AAK-së.
Pse “Srspka” mund të ndryshojë qëndrim?
Megjithatë, të gjitha më lartë janë matematikat e një ditë para hedhjes në votim të Demarkacionit dhe qëndrimet mund të ndryshojnë.
Eshtë Lista Serbe e cila deri nesër mund të ndryshojë qëndrim, por kjo varet krejt nga bisedimet që do zhvillohen sot në Bruksel me Serbinë ku kërkesë kryesore e Beogradit zyrtar është angazhimi për themelimin e Asociacionit të Komunave me shumicë serbe apo sic njihet ndryshe “Zajednica”, pa vonesa të mëtejme.
Pra në këmbim të votave për Demarakcionin, Lista Serbe do të kërkojë që të caktohet një datë se kur mund të themelohet “Zajednica”, sigurisht sipas mënyrës si ata duan, e jo një organizate joqeveritare siç thonë drejtuesit e institucioneve kosovare.
Mbetet të shihet se cili do jetë epilogu i bisedimeve në Bruksel për të mësuar nëse “Srspska” do të marrë urdhër nga presidenti Vucic, që të ndryshojnë apo jo qëndrim për Demarkacionin. /tesheshi.com/
