Qeveria e krahut të djathtë në Hungari pretendon se janë rreth 900 zona “të pakalueshme” në Londër, Paris, Stokholm e Berlin, të cilat janë jashtë kontrollit të qeverive respective e ku emigrantët bëjnë ligjin. Ky argument përdoret në faqen e internetit e cila është krijuar në mbështetje të referendumit të afërt për kundërshtimine kuotave të emigrantëve që ka caktuar Bashkimi Europian.
Kryeministri hungarez, Viktor Orban refuzoi të merrte pjesë në programin e kuotimit të Bashkimit Europian për risistemimin e 160 mijë emigrantëve në të gjithë kontinentin, duke e cilësuar atë një abuzim me pushtetin. Në stilin e tij të zakonshëm prej të forti, vitin e kaluar ai kishte deklaruar: “Në tre vjet ne mund të mos e dimë se ku jemi, në Londër, Paris apo Budapest”.
Referendumi që do të mbahet në vjeshtë do të shtrojë për votim pyetjen: “A dëshironi që BE të caktojë rivendosjen e detyrueshme të qytetarëve jo-hungarezë pa miratimin e parlamentit të Hungarisë?”
Faqja qeveritare e internetit, ndërkaq, titullohet “I themi jo kuotave të detyrueshme”, dhe në të përcaktohen 900 zona të “pakalueshme” pasi “lagjet nuk janë në kontroll, ose mbahen me vështirësi në kontroll, ku “normat e shoqërisë mikpritëse zëre se nuk ekzistojnë”.
I pyetur për të emërtuar zonat e Londrës që qeveria hungareze i konsideron të paarritshme, zëdhënësi Zoltán Kovács tha për gazetën “The Guardian”: “Çdo gjë bazohet në të dhëna dhe burime publike të aksesueshme”.
Sipas qeverisë, 751 nga këto zona “të pakalueshme” janë në Francë. Ministria citon një blog të vitit 2006 për zonat urbane sensitive nga akademiku Daniel Pipes, i cili thuhet se ka përdorur i pari frazën “zona të pakalueshme” për të përcaktuar lagje me popullsi të mëdha emigrantësh.
Por, Pipes, një akademik i njohur më së shumti për pretendimin se presidenti amerikan, Barack Obama ishte një musliman praktikant, më pas e tërhoqi deklaratën e tij pasi kishte vizituar Francën. “Duke pasur tashmë përvojë vetjake, pendohem që kam përkthyer atë që qeveria franceze i përcakton si zona urbane të ndjeshme, si zona urbane të rrezikshme”, shkroi ai në vitin 2013.
Prova të tjera të paraqitura nga ministria hungareze përfshijnë edhe një blog amerikan për Suedinë me një link që është fshirë, që cakton 55 “zona të nxehta” të identifikuara nga policia suedeze, që sipas asaj që thekon blogu, nuk e përdor në fakt, termin “zona të rrezikshme”.
Ministria dërgoi si provë mbështetëse për pyetjet e “The Guardian” një artikull të “Daily Telegraph” në lidhje me një lagje të Brukselit, Molenbeek pas sulmeve terroriste të nëntorit në Paris.
Megjithë këto prova që nuk provojnë ndonjë gjë, faqja e internetit që mbështet kundërshtimin e kuotave të BE-së për emigrantët, është funksionale. Në të ka edhe seksione që trajtojnë çështje si “kuotat e detyrueshme rrisin rrezikun terrorist”, apo “kuotat e detyrueshme kërcënojnë kulturën tonë” si dhe një orë që përfaqëson faktin që çdo 12 minuta në Europë hyn një emigrant.
Por, sipas statistikave zyrtare të policisë hungareze, kjo shifër e zmadhon atë që ndodh aktualisht në kufirin hungareze me 6 mijë për qind.
Përgatiti: Juli Prifti – /tesheshi.com/
