Krerët e PAN-it, Ramush Haradinaj dhe Kadri Veseli nuk po lënë gurë pa lëvizur që të sigurojnë 61 deputetë për krijimin e qeverisë.
Por edhe nëse arrinë këto vota, ata duhet të përballen me drejtësinë. Kështu të paktën mendon deputetja e Vetëvendosje-s, Albulena Haxhiu e cila ka kërkuar veprimin e Prokurorisë së Shtetit, pasi thotë se ky koalicion mund t’i bëj numrat vetëm duke shantazhuar ose blerë deputetët.
“Është e qartë që asnjëri nga deputetet nuk do ta votonin për parime apo me bindje të lirë qeverisjen e klanit ‘Pronto’. Nuk mund të ketë përkrahje të vullnetshme për njerëz që janë përgjegjësit kryesorë për mjerimin, varfërinë, padrejtësitë e pabarazitë por edhe për krimin e korrupsionin. Andaj nëse koalicioni PAN arrin t’i ketë mbi 61 deputetë, do të duhej menjëherë të vepronte prokuroria sepse dihet hapur se ka pasur blerje o shantazh të deputeteve!”, ka shkruar Haxhiu në Facebook.
Kujtojmë se ka ditë që drejtues të PAN-it deklarohen se kanë siguruar votat e nevojshme të deputetëve për ta formuar ekzekutivin, por pa dhënë detaje të hollësishme për këtë. /tesheshi.com/
