Pas dy barazimesh e dy humbjesh, ka ardhur një fitore për Argjentinën në fushatën kualifikuese për botërorin Rusi 2018.
Në një përballje të vështirë ndaj Kolumbisë, ai që ka hapur serinë e golave për argjentinasit ka qenë Lionel Messi, i cili do të shënonte në minutën e 10-të. Ai realizoi nga një goditje dënimi nga një largësi e konsiderueshme; gjuajtja e tij ishte spektakolare.
Aguero nuk u aktivizua fare, ndërkohë që Higuain hyri në lojë në minutën e 79-të. Pratto dhe Di Maria e çuan ndeshjen në 3-0 me golat e tyre. Fitorja e ngjit Argjentinën në vend të pestë midis dhjetë skuadrave.
Brazili, ndërkohë, nuk ka të ndalur në ecurinë pozitive. Ndaj Perusë, në transfertë, u shënua e gjashta fitore radhazi. Gabriel Jesus dhe Renato Augusto qenë realizuesit e golave në fitoren 0-2.
Brazilianët janë të parët në grupin e eliminatoreve në Amerikën e Jugut.
Në një tjetër takim të rëndësishëm, Kili fitoi 3-1 ndaj Uruguajit. Alexis Sanchez, lojtari i Arsenalit në kampionatin anglez, qe protagonist me dy golat e tij.
Pavarësisht nga humbja, Uruguaji mban ende vendin e dytë në klasifikim.
Ekuadori fitoi pastër ndaj Venezuelës, 3-0. Minimale, 1-0, ishte fitorja e Bolivisë ndaj Paraguajit.
Ndeshjet kualifikuese për Botërorin do të rinisin në mars edhe në këtë pjesë të botës. /tesheshi.com/
https://youtu.be/G5LpVRjgSak
