Dy rivalët më të egër të futbollit amerikanolatin, e dy nga përfaqësueset më të njohura e më të suksesshme të botës, gjenden në pozita krejt të kundërta pas ndeshjeve të 14-ta të kualifikueseve për botërorin e ardhshëm.
Brazili është bërë i pari ekip që kualifikohet për në Botëror; ndryshe tij, Argjentina rrezikon që të mos ketë biletë për në Rusi.
Vetëm pak orë pasi Messi do të merrte një dënim me katër ndeshje për fyerje të gjyqtarit në takimin ndaj Kilit, Argjentina u poshtërua nga Bolivia, nga ekipi që renditet veç i nënti mes dhjetë skuadrave të grupit amerikanolatin.
Humbja 2-0 ndaj Bolivisë do të thotë që argjentinasit tani do të duhet të mendojnë se si do t’ia bëjnë pas Lionel Messi-n në katër ndeshjet e mbetura, pasi ndodhen në vend të pestë në kualifikueset; një pozitë që nuk ta mundëson vajtjen drejtpërdrejt në Botëror.
Përndryshe, Brazili shënoi fitoren e tetë radhazi, mposhti 3-0 Paraguajin dhe, me humbjen 2-1 të Uruguajit në fushën e Perusë, u bë përfaqësuesja e parë që garanton kualifikimin.
Coutinho, Neymar e Marcelo ishin golashënuesit në një ndeshje ku lojtari më i mirë u përcaktua Paulinho.
Në dy takime të tjera, Kolumbia fitoi 0-2 në transfertën ndaj Ekuadorit, e Kili mundi ekipin më të dobët të grupit, Venezuelën, 3-1. /tesheshi.com/
