Kupa e Amerikës ka vijuar në orët e hershme të kësaj të marte me dy ndeshjet e para të grupit D. Takimi mes Argjentinës dhe Kilit ka qenë i shumëpritur, pasi vinte përballë dy finalistët e edicionit të shkuar.
Dhe fitorja i ka buzëqeshur Argjentinës, që ka marrë tre pikët e para. Argjentinasit kanë fituar 2-1 në “Levi’s Stadium”, në Santa Klara të Kalifornisë, njëlloj si më 25 mars të këtij viti, në një ndeshje të vlefshme për eliminatoret e Kupës së Botës së 2018-tës.
Trajneri Gerrado Martino kishte zgjedhur ta linte në stol Lionel Messi-n, siç kishte bërë dhe me Lamela-n e Biglia-n, dy lojtarë po ashtu të formacionit kryesor.
Pjesa e parë do të mbyllej pa gola, me raste në të dy portat. Di Maria dhe Banega do të spikasnin për argjentinasit me të nisur 45 minutat e dyta. Fillimisht, në minutën e 51-të, është Banega që i jep një top Di Maria-s, e ky i fundit e çon atë në rrjetën kundërshtare me të majtën e tij. Tetë minuta më vonë dy lojtarët ndryshojnë pozicionet: Di Maria pason për Banega-n, thuajse në një sulm identik me atë të golit të parë, dhe lojtari i Seviljes i çon shifrat në 2-0.
Higuain ishte pranë një goli të tretë në minutat në vazhdim, me përpjekjen e tij të ndaluar nga portieri Bravo. Mes një loje të ashpër dhe të tensionuar, tipike për këto skuadra, rezultati do të ngushtohej në minutën e 93-të, kur Fuenzalida shfrytëzon një dalje të gabuar të Romero-s, godet me kokë dhe shënon.
Menjëherë më pas do të binte bilibili që lajmëronte përfundimin e takimit: 2-1 për Argjentinën.
Po 2-1 fitoi dhe Panamaja ndaj Bolivisë më herët. Dy golat e panamezëve patën një autor, Blas Perez-in. Për bolivianët do të barazonte përkohësisht Arce.
Argjentina e Panamaja e kryesojnë grupin D me nga tre pikë.
Sonte nisin ndeshjet e dyta në grupe. Pas mesnate do të luhen dy sfida të grupit A, SHBA – Kosta Rika dhe Kolumbi – Paraguaj. /tesheshi.com/
