Paraqitje spektakolare ka qenë ajo e Argjentinës në gjysmëfinalen e Kupës së Amerikës. Ndaj SHBA-ve, skuadrës së vendit organizator, argjentinasit kanë treguar klas e cinizëm, duke fituar 4-0 nën dirigjimin e Lionel Messi-t.
Në Hjuston, në një stadium të mbushur plot, skuadra e Gerardo Martino-s as e ka vënë në dyshim fitoren. Muzika e fituesve ka nisur që në çastet e para. Një pasim kryevepër i Messit në minutën e 3-të dhe një goditje me kokë e Lavezzi-t e kanë kaluar Argjentinën në epërsi.
Në kontroll të lojës, goli i dytë do të pasonte në pjesën e parë. Një goditje dënimi e gjuajtur mjeshtërisht nga lojtari më i mirë në botë, dhe topi ka përfunduar aty ndërton folenë merimanga, në qoshen e majtë të portierit amerikan. Messi ka treguar mjeshtëri, 2-0!
Pjesa e dytë do të jetë një vijim i së parës, por këtë herë me protagonist golashënuesin më të mirë të kampionatit italian. Higuain shënon dy herë gjatë këtyre 45 minutave, për ta çuar përfundimisht Argjentinën në finale. Rezultati përfundimtar është 4-0, dhe pasqyron epërsinë e padiskutueshme të finalistëve.
Në 02:00 të së enjtes luhet gjysmëfinalja tjetër, Kolumbi – Kili. E nëse Kili fiton, do të kemi një përsëritje të finales së vjetshme, Kili – Argjentinë.
Interesante do të jetë, por të presim më së pari zhvillimin e kësaj gjysmëfinaleje sonte pas mesnate. /tesheshi.com/
