Nga Ylli Pata
Në kulmin e përplasjes ndërmjet Rusisë dhe Perëndimit, kryesisht në Europën Lindore dhe Ballkan, NATO ka vendosur që të zhvillojë në Tiranë samitin më të lartë ushtarak të eprorëve me spaleta të saj.
Njërën prej dy mbledhjeve vjetore, 29 shefat e shtabeve të ushtrive të Aleancës Atlantike që përbëjnë Komitetin Ushtarak të NATO-s, kanë vendosur ta mbajnë në Tiranë, si një shenjë më shumë politike sesa ushtarake. Gjeneralët janë pritur mbrëmë në Pallatin e Brigadave nga shefi i shtabit të ushtrisë shqiptare, Gjenerali Bardhyl Kollçaku, ndërsa kryeministri Edi Rama i përshëndeti me një fjalim të posaçëm.
Siç bën të ditur në një njoftim për shtyp zyra e mediave e NATO-s në Bruksel, samiti i Tiranës është i fokusuar në dy probleme: i pari është që ta kthejnë në një plan ushtarak strategjinë e shpallur nga Donald Trump për Afganistanin, ku pritet të rriten forcat aleate, dhe pika e dytë do të jetë Ballkani dhe veçanërisht Kosova.
Komandanti i KFOR-it, gjenerali italian Giovani Fungo, do të raportojë në mënyrë të posaçme planin e sigurisë atje, ku dhe do të propozojë një rishpërndarje forcash në terren. Prej disa muajsh, disa njësi amerikane forcash speciale janë dërguar në veri të Kosovës për të penguar incidentet dhe krijimin e gjasave për operacione të tipit “Krime” apo “Donbas”, ku të mund të krijohet mundësia për ndërhyrje nga ana e Beogradit, i cili mbështetet nga Moska.
Ekzistenca gjithnjë e më aktive e qendrës operacionale ruso-serbe të Nishit, ka alarmuar aleatët e NATO-s të cilët kanë vendosur që të mblidhen në kryeqytetin shqiptar, që të tregojnë me prezencën fizike rëndësinë për aleatët ballkanikë.
Dy ditë më parë në Bisht-Pallë u zhvillua një stërvitje e përbashkët e trupave ushtarake shqiptare dhe britanike, pikërisht si sinjal i ndërhyrjes së forcave të NATO-s në rast nevoje.
Ndërkaq, prej disa muajsh në Adriatik, në ujrat shqiptare, ato malazeze dhe kroate respektivisht janë ankoruar tre anije lufte të shteteve të mëdha të NATO-s: një turke, një amerikane dhe një britanike.
Komiteti Ushtarak i NATO-s, që është një nga dy trupat thelbësorë të Aleancës (ai politik që merr vendimet dhe ai ushtarak që i kthen në plane luftarake), do të zgjedhë në Tiranë sot kreun e ri të institucionit, i cili sipas të gjitha gjasave do të jetë shefi i shtabeve të ushtrive europiane dhe siç mësohet nuk do të jetë një amerikan.
Aktualisht, Komiteti drejtohet nga gjenerali çek Petr Pavel.
Shqipëria është vendi që së bashku me Malin e Zi kanë edhe ushtritë më “simbolike” në NATO dhe mbajtja e një takimi të tillë të nivelit të lartë të Aleancës ka më shumë vlerë politike, megjithëse Edi Rama i premtoi SHBA se do të rrisë me një togë komandosh misionin në Afganistan.
Më shumë se një “dhuratë” politike për Edi Ramën pas formimit të qeverisë së tij të dytë, duket se është një alarm i NATO-s në lidhje me rrezikun rus në rajon, ku SHBA ka ndarë edhe shuma të mëdha parash për të amortizuar Sputnik-un. /tesheshi.com/
