Nëse qytetarët e Bashkimit Evropian ulin ngrohjen e tyre në dimër me 1 gradë Celsius, atëherë kjo do të ndihmojë BE të kursejë rreth 7% në përdorimin e energjisë për një vit.
Kështu thuhet në një postim të Ursula von der Leyen, e cila prezantoi një pjesë të masave të propozuara nga
Komisioni që vendet anëtare të BE-së t’i përgjigjen dimrit të vështirë që pritet, duke pasur parasysh pengesat që ka lufta në Ukrainë dhe sanksionet ndaj Rusisë.
“Reduktimi i temperaturës në ngrohjen e një shtëpie me vetëm 1 gradë Celsius mund të kursejë rreth 7% të energjisë gjatë një viti”, shkroi presidentja e Komisionit Europian.
Ajo deklaroi gjithashtu se “rezultate mbresëlënëse” në kursimin e energjisë jep edhe rritja e vogël e temperaturës gjatë ftohjes së dhomave në muajt e verës, duke theksuar se “në të gjithë BE-në aplikohen mënyra inteligjente të kursimit të energjisë”.
Von der Leyen madje iu referua masave të kursimit që Komisioni po ndjek në ndërtesat e veta: “Për shembull, ne mbyllim ngrohjen dhe ftohjen në shumicën e ndërtesave 1 orë më herët se më parë, duke kursyer 3% të përdorimit vjetor të energjisë. Po mbyllim edhe disa ndërtesa për verën dhe po lehtësojmë punën në distancë”.
Kujtohet se në fund të korrikut, Komisioni Evropian propozoi objektivin për uljen e kërkesës për gaz me 15% nga vendet e BE-së deri në fund të marsit të vitit të ardhshëm.
E gjithë kjo, pasi Gazprom i Rusisë njoftoi se çmimet evropiane të gazit mund të rriten me 60% të tjera për të kaluar 4,000 dollarë për 1,000 metër kub këtë dimër, ndërsa eksportet dhe prodhimi i kompanisë shtetërore vazhdojnë të ulen për shkak të sanksioneve perëndimore.
Flukset e gazit natyror nga Rusia kanë rënë këtë vit pasi një tubacion nga Kievi u mbyll pas pushtimit të Ukrainës nga Moska në shkurt dhe pas një mosmarrëveshjeje mbi pjesë të pajisjeve të gazsjellësit Nord Stream 1 që çoi në një rritje të çmimeve të gazit natyror. /tesheshi.com/
