Kapiteni i kombëtares turke duket t’i ketë ditët e numëruara te katalanasit e Barcelonës. Një sezon i çuar pa shkëlqim mes yjeve të Barçës i ka bindur drejtuesit e klubit spanjoll që kundrejt një oferte të kënaqshme t’i japin duart mesfushorit 29-vjeçar me tipare sulmuese.
Pas katër viteve të kaluara te Atletiko e Madridit, ku Arda Turan qe mes lojtarëve kryesorë që i dhanë jetë projektit të ri të Diego Simeone-s, një kontratë pesëvjeçare do ta transferonte atë te Barcelona. Turku do të niste të luante vetëm në janar, pas një dënimi të UEFA-s për klubin. Por koha e aktivizimit të tij do të përkonte me kulmin e formës së Barcelonës, çka do t’ia bënte atij të pamundur të spikaste. Mosgjetja e hapësirave dhe vështirësia në përshtatje ngjan t’i kenë dhënë fund aventurës së tij te Barcelona.
Siç njofton Marca spanjolle, skuadra kampione e Italisë, Juventusi, ka shprehur dukshëm një interesim për lojtarin. Arta Turan mund të huazohet fillimisht, për t’u blerë në fund të sezonit nëse arrin të lërë gjurmë. Ekipi torinez po përpiqet t’i paraprijë një shitjeje të mundshme të francezit Paul Pogba, duke kërkuar të gjejë lojtarët që mund ta zëvendësojnë atë.
Por Juventusi duhet të shpejtojë nëse kërkon ta ketë në radhët e veta turkun, pasi dy skuadra angleze, Arsenali e Çelsi, e kanë gjithashtu në planet e tyre.
Arda Turan kaloi po ashtu një qershor të trazuar. Përfaqësuesja turke nuk bëri një paraqitje të mirë në Europian, e një prej fajtorëve u cilësua dhe ai. Turan do të gjendej në një pozitë aspak të këndshme në takimin ndaj Spanjës, ku do të fishkëllehej nga tifozët turq e do të përkrahej nga ata spanjollë. /tesheshi.com/
