Mensur Krasniqi
Arben Taravari, ministër i Shëndetësisë, duket se do të jetë kandidati për kryetar komune i Gostivarit nga “Aleanca për Shqiptarët”. Taravari është monimuar kandidat nga të gjitha strukturat e kësaj partie, duke u renditur në këtë mënyrë i pari në garën për Gostivarin.
Por së pari, Taravari duhet të tërhiqet nga posti ministror. Në këto kushte Aleanca do të kërkojë që të mbajë nën kontroll sektorin e shëndetësisë, duke propozuar që në seancën e parë pas zgjedhjeve vendore të ketë të drejtën e propozimit të ministrit të ri.
Në anën tjetër, Taravari ka deklaruar se nëse nuk fiton Gostivarin do të dorëhiqet nga politika.
“Nuk ka asnjë anëtar nga partia jonë që do ta kandidonim për kryetar komune. Shpresonim se do të dakortësoheshim me ndonjë parti tjetër, por nuk arritëm. Nëse nuk fitoj në Gostivar, do të largohem nga politika dhe do të jem mjek”, ka deklaruar për televizionin maqedonas NOVA, ministri Taravari.
Por një deklaratë të tillë, ai ka bërë edhe para zgjedhjeve parlamentare, kur tha se nuk do të pranonte që të kandidohej në vendet e para të listave për deputetë, por do të kandidojë i 20-ti. Por në fakt ai u rendit i dyti.
Pasi nuk arriti të grumbullojë votat e nevojshme për deputet, Taravari tha se do të pranojë poste qeveritare, por në fund u emërua ministër i Shëndetësisë.
Referuar këtyre rasteve lind pyetja: a do ta mbajë fjalën Taravari nëse humbet Gostivarin?
Ndonëse kandidatura e tij parashihet si më e mira për të fituar përballë Nevzat Bejtës së BDI-së, ka pasur edhe komente negative nga ana e qytetarëve në drejtim të Taravarit.
Kjo lidhet me faktin se një pjesë mendojnë se si profesionist në fushën e shëndetësisë ai duhet të drejtojë ministrinë përkatëse.
Taravari gjithashtu sqaroi se deri në zgjedhjet lokale do të kryejë funksionin ministër i Shëndetësisë, do të vijë çdo mëngjes në institucion, ndërsa obligimet do ti ndajë me zëvendësin e tij dhe me sekretarin shtetëror. /tesheshi.com/
