Sekretari i Përgjithshëm i PD, Arben Ristani ka reaguar lidhur me debatin e hapur pas votimit të kreut të Kuvendit, Gramoz Ruçi.
Në një koment në rrjetin social, Ristani e quan të turpshme rrjedhjen e votave të PD-së pro Ruçit.
“Zgjedhja e Gramoz Ruçit në krye të Kuvendit është njolla e turpit e Parlamentit dhe përdhosje e gjakut të të përndjekurve politikë, e gjakut të Arben Brocit, Bujar Bishanakut, Nazmi Kryeziut dhe Besnik Çeres.
Për më tepër, shumë e turpshme ishte edhe ajo që ndodhi me ato vota të opozitës, që shkuan në favor të Ruçit.
U manipuluan apo u blenë?!Kjo është një pyetje që kërkon përgjigje të faktuar.
Besoj se do ishte me vend të diskutohej kjo çështje në forumet e PD dhe të kërkohej menjëherë rinumërimi i fletëve të votimit, hetim i specializuar i çështjes dhe kontrolli i kamerave të parlamentit dhe mediave.
Nëse votat manipulohen brenda Parlamentit, ky është fundi i demokracisë dhe duhet vendosur se çfarë duhet bërë me këtë Parlament.
Nëse deputetët tanë, qofshin këta edhe aleatë, shiten si në pazar, ne nuk mund dhe nuk duhet të bashkëjetojmë me ta.
Është e domosdoshme të përpunojmë rregulla për të kufizuar dhe eleminuar tregun e shit-blerjes së deputetëve. Opozita moralin dhe besimin ka kuaj beteje”, shkruan Ristani.
Sekretari i Përgjithshëm i PD nuk mundi të sigurojë një vend në legjislaturën e re, pasi renditej i 4-ti në listën e kandidatëve për deputet në Qarkun e Vlorës, ku kjo parti morri vetëm 3 mandate. /tesheshi.com/
