Nga Bardha Nergjoni
Ndërkohë që kryeministri inaguronte Bunk’Art, si shenjë e kujtimi ndaj dikaturës, Arben Derhemi kishte veshur petkun e Atë Zef Pllumit në skenën e teatrit për të sjellë kujtimet me mesazhe të forta të priftit nammadh që kaloi jetën në burg. Në një monolog me ironi therëse, Derhemi përcolli atë që përjetoi dhe arriti të shkruante shkodrani i kthyer në simbol të dorës së ashpër të diktaturës ndaj “armiqve të pushtetit”. Regjisori Milto Kutali kishte përzgjedhur me kujdes pjesët e veprës “Rrno për me tregue” duke përcjellë dramën e tmerrshme të urrejtjes së njeriut për njeriun, treguar pikërisht mes dashurisë për kafshët. “Mesazhi që duam të përcjellim ne është ai që i shërben më shumë shoqërisë sot: njerëzit duhet ta gjejnë gjuhën e komunikimit me njëri-tjetrin. Ata e kanë gjetur gjuhën me kafshën e bimën; e si ka mundësi që ka tragjedi ligjërimi që nuk e arrijnë të komunikojnë mes njerëzve. Sigurisht që kjo pjesë vjen në formën e një katharsis por edhe një komunikim dhe një urë me gjeneratën e re”.
Arben Derhemi shkon më tej. Për të ka ardhur koha që në Shqipëri të kërkohet falje për të kaluarën. “Falja është një nga virtytet kryesore të njeriut. Në Shqipëri ka ardhur koha të kërkojnë falje. Sigurisht që arti nuk detyron por merr përsipër të shtrojë çështje. Por gjithësesi për të një gjë e tillë nuk do të ndodhë. Për mua nuk do të bëhet kurrë një gjë e tillë. Ismail Kadare ka thënë se kjo vepër duhet lexohet së pari nga ish-komunistët sesa nga viktimat e atij sistemi”.
Nën rrobën e Atë Zef Pllumit, Arben Derhemi ka përgjegjësinë të përcjellë një personazh të shumë dimensioneve dhe e arrin të përcjellë emocion.
“Çdo rol është i vështirë për të veshur rrobën e personazhit, por Atë Zef Pllumi ishte më i vështirë pasi ai nuk ka vetëm urtësinë e tij por edhe urtësinë e popullit. Një njeri që ka kaluar shumë vite në burg dhe gjatë gjithë kohës vetëm pëson.”
Shfaqja është pritur mirë në disa qytete dhe ka pasur një efekt të jashtëzakonshëm tek njerëzit aq sa lotët nuk kanë munguar.
Arben Derhemit i është dashur të jetojë tri ditë si Atë Zef Pllumi për të sjellë këtë rol sa më afër figurës së njohur të priftit françeskan. “Nëse nuk e njeh atë vepër nuk mund ta transmetosh te publiku. Nëse nuk e jeton me personazhin tënd nuk mund të emocionosh. Kam jetuar tre ditë në kishën françeskane për të jetuar atë që ka jetuar Atë Zef Pëllumbi”, përfundon Derhemi për monodramën e tij të shkëputur nga “Rrno për me tregue”. /tesheshi.com/
