Qeveria saudite ka zbuluar se pret që një deficit buxhetor të rritet në vitin 2020, i cili mund të arrijë deri në 49.86 miliardë dollarë (defiçiti buxhetor në vitin 2019 ishte 34 miliardë dollarë).
Ministri saudit i Financave, Mohamed Al Jadaan tha se të ardhurat e buxhetit për vitin 2020 vlerësohen në 833 miliardë rialë (222.1 miliardë dollarë), nga 244.5 miliardë dollarët e pritur.
“Qeveria do të vazhdojë të mbështesë projekte mega, të rrisë efikasitetin e shpenzimeve dhe t’i mundësojë sektorit privat të krijojë vende pune. PBB reale pritet të rritet 2.3% vitin e ardhshëm”, tha ministri Jadaan.
Gjithashtu, ai beson se borxhi publik i Arabisë Saudite do të rritet në 26% të PBB-së vitin e ardhshëm, ose 754 miliardë rialë (201 miliardë dollarë), një rritje prej 2 përqind gjatë vitit aktual 2019.
“Qeverisë do t’i duhet një çmim nafte prej 71 dollarë për fuçi për të balancuar buxhetin e tij vitin e ardhshëm”, sipas një raporti të Al Rajhi Capital.
I njëjti raport shprehet se gati 60% e defiçitit buxhetor të Arabisë Saudite do të kompensohen nga huazimi dhe pjesa tjetër e rezervave gjatë viteve të ardhshme.
Në fillim të këtij viti, Fondi Monetar Ndërkombëtar paralajmëroi se “Mbretëria duhet të forcojë politikën e saj fiskale për të zvogëluar ndikimin e një defiçiti në zgjerim”. /tesheshi.com/
