Baza ushtarake ajrore e Inxhirlikut në Turqi do të presë avionë luftarakë dhe personel ushtarak nga Arabia Saudite në bazë të një marrëveshjeje të përbashkët mes dy vendeve.
E ka bërë të ditur këtë ministri i Jashtëm turk, Mevlut Çavushogllu, në një deklaratë për të përditshmen Yeni Şafak. Numri i avionëve dhe i ushtarëve sauditë mbetet ende i paqartë, sipas kryediplomatit turk.
“Në çdo takim të koalicionit ne kemi theksuar nevojën për një strategji të gjerë, të përqendruar në përfundimin, në luftën kundër grupit terrorist të DAESH-it,” ka thënë Çavushogllu për Yeni Şafak-un.
“Nëse kemi një strategji të tillë, atëherë Turqia dhe Arabia Saudite mund të nisin një operacion nga toka,” ka sqaruar shefi i politikës së jashtme turke.
“Sauditët e vizituan bazën për vëzhgim. Arabia Saudite e deklaroi vendosmërinë kundër DAESH-it duke duke thënë se qe gati të dërgonte avionë dhe trupa.”
Çavushogllu ka folur dhe për Rusinë. “Askush nuk po e ngre zërin kundër Rusisë që po kryen sulme në Siri, vetëm 12 për qind e të cilave kanë në objektiv terroristët e DAESH-it. Ne kemi kërkuar një zgjidhje që do të garantojë ndihmën humanitare dhe përfundimin e sulmeve. Njerëzit janë lënë në rajonet e rrethuara. Ky është krim. Objektivi i Rusisë është mbështetja e Esadit, ne të gjithë e dimë këtë. Por pyetja është kjo: Kush ka për ta ndalur Rusinë ta bëjë këtë? Kombet e Bashkuara, NATO-ja apo SHBA-të?”
Ndërkohë, ministri i Jashtëm saudit, Adil el-Xhubejri, ka folur për një gazetë gjermane, siç lajmëron The Independent.
Ai ka deklaruar se ndërhyrja ruse nuk do ta ndihmojë Esadin të qëndrojë në pushtet. “Nuk do të ketë Beshar Esad në të ardhmen,” është shprehur prerë el-Xhubejri.
Zhvillimet e fundit vijnë vetëm pak orë pasi mes fuqive të mëdha është rënë dakort për një “ndërprerje të luftimeve” në Siri. Fakti që marrëveshja nuk e përfshin ISIS-in (apo, ndryshe DAESH-in) dhe Frontin en-Nusra, e po ashtu se Rusia nuk do t’i ndërpresë sulmet ajrore mbi pozicionet e tyre, e bën shumë të dyshimtë një rezultat të prekshëm të “ndërprerjes së luftimeve.”
Dislokimi i trupave dhe avionëve luftarakë të Arabisë Saudite në Inxhirlik të Turqisë lajmëron një përkeqësim të situatës së përgjithshme, me një konflikt që i ka tashmë të gjitha gjasat të përfshijë dhe aktorë të tjerë në zjarrin e tij. /tesheshi.com/
