Pasi husinjtë, milicia shiite, morën kontrollin e aeroportit ndërkombëtar të Adenit dhe të pallatit presidencial të mërkurën në mbrëmje, Arabia Saudite dhe një koalicion i aleatëve rajonalë kanë nisur një operacion ushtarak në Jemen. Këtë e bën të ditur ambasadori i Arabisë Saudite në Shtetet e Bashkuara të Amerikës, Adel el Xhubejri.
Ambasadori njoftoi se operacioni përfshin dhjetë shtete, duke patur në të vendet arabe të Gjirit Persik, dhe theksoi se ai kërkon të mbrojë dhe të mbështesë qeverinë legjitime të Jemenit, e ta pengojë lëvizjen radikale të husinjve të marrë në dorë tërë vendin.
Emisari saudit tha se aksioni ishte kufizuar për momentin në sulme ajrore mbi objektiva të caktuara në Jemen, por se njëkohësisht janë mobilizuar dhe formacione të tjera ushtarake, e se koalicioni do të bënte ç’të ishte e nevojshme.
“Kemi një situatë ku një grup milicie ka apo mund të ketë nën kontroll raketat balistike, armët e rënda dhe një forcë ajrore,” shtoi ambasadori, duke u shprehur se nuk mund të tolerohej më përparimi i husinjve.
Jemeni është përfshirë nga trazirat që në shtator, kur husinjtë mësynë në kryeqytetin Sana, nga ku kërkuan ta shtrijnë ndikimin dhe në pjesë të tjera të vendit.
Presidenti Abdurabbi Mansur Hadi e ka lënë vullnetarisht rezidencën e tij në Aden mbrëmjen e shkuar, sipas zyrtarëve amerikanë, ndërsa raporte të ndryshme kanë informuar se ai është larguar për në Xhibuti. Burimet zyrtare i mohuan këto zëra, dhe deklaruan se ai është ende në Jemen.
Hadi qe detyruar muajin e fundit të zhvendosej nga kryeqyteti Sana në Aden, në jug të vendit. Me të arritur në qytetin jugor, ai i quajti të pavlefshme dhe të paligjshme të gjitha dekretet e nxjerra së fundi nga husinjtë.
Këta të fundit, nga ana e tyre, patën lëshuar një të ashtuquajtur deklaratë kushtetuese që e shpërndante parlamentin dhe krijonte një këshill kalimtar prej 551 anëtarësh.
Por deklarata u hodh poshtë nga shumica e forcave politike të Jemenit, së bashku me disa vende fqinje të Gjirit Persik, që e përshkruan atë si një grusht shteti kundër legjitimitetit konstitucional.
