Katër vende, Arabia Saudite, Bahrejni, Egjipti dhe Emiratet e Bashkuara Arabe, kanë ndërprerë marrëdhëniet diplomatike me Katarin në orët e para të së hënës për shkak të mbështetjes së pretenduar të këtij vendi për grupet ekstremiste.
Agjencia e lajmeve SPA, Saudi Press Agency, thotë se Arabia Saudite e ka ndërmarrë këtë veprim si pasojë e shkeljeve serioze nga autoritetet në Doha gjatë këtyre viteve për të inkurajuar përçarjen dhe sektarizmin në Mbretëri.
Riadi e ka akuzuar po ashtu median e Katarit për përpjekje për minim të koalicionit të udhëhequr nga sauditët në luftën kundër huthinjve në Jemen.
Sipas agjencisë së lajmeve Reuters, tre vendet e Gjirit u kanë dhënë dy javë kohë vizitorëve dhe banorëve nga Katari për t’u larguar; një masë tjetër është mbyllja e kufirit nga sauditët dhe ndalimi i trafikut ajror e detar me Katarin.
Bahrejni u ka lënë 48 orë kohë diplomatëve të Katarit për t’u larguar; Egjipti njoftoi mbylljen e hapësirës ajrore dhe të porteve detare për çdo transport nga Katari me argumentin e mbrojtjes së sigurisë kombëtare.
Nga mëngjesi i së martës do të ndërpriten dhe fluturimet drejt Katarit dhe prej tij nga Etihad Airways, kompania ajrore e Emirateve të Bashkuara Arabe.
Koalicioni i udhëhequr nga Arabia Saudite, që lufton ndaj rebelëve në Jemen të mbështetur nga Irani, njoftoi se Katari nuk ishte më i mirëpritur në këtë aleancë. /tesheshi.com/
