Shefi ekzekutiv i Apple, Tim Cook u zotua të japë një shumë të madhe parash për të kontribuar në lehtësimin e gjendjes së refugjatëve në Europë. Ai tha se donacioni është domethënës e do të shkojë për agjencitë e ndihmave që kujdesen për refugjatët ndërsa ata largohen nga lufta civile në Siri e në vende të tjera në Lindjen e Mesme.
“Europa, ku shumë njerëz presin të gjejnë sigurinë, po përjeton krizën më të rëndë të refugjatëve që nga Lufta e Dytë Botërore”, tha Cook në një memo të brendshme të kompanisë, duke shtuar se me mijëra njerëz kanë humbur jetën në udhëtime të rrezikshme përmes detit.
Shefi ekzekutiv i Apple tha se edhe klientët e kompanisë mund të dhurojnë lehtësisht para për Kryqin e Kuq përmes aplikacioneve App Store dhe iTunes.
“Apple është i përkushtuar në avancimi e të drejtave të njeriut kudo në botë”, vijoi Cook, duke thënë se shpreson që ndihmat t’ua bëjnë jetën këtyre njerëzxve më pak të dëshpëruar.
Më parë, Cook kishte deklaruar se planifikon që të dhurojë pjesën më të madhe të pasurisë së tij për bamirësi, dhe se programi i bamirësisë së Apple ka mbledhur prej vitit 2011, 25 milionë dollarë.
Edhe pse kompania është tepër e rezervuar për shumat e donacioneve që jep, media ka zbuluar se Apple ka dhënë 100 milionë dollarë për një project kundër SIDA-s dhe 100 milionë të tjerë në 2014, për një projekt arsimor. /tesheshi.com/
