Ish-prokurori në Prokurorinë e Përgjithshme Artur Selmani, i njohur si aspirant për kreun e këtij institucioni, e nga ana tjetër dhe si një njeri i drejtësisë që ishte përfshirë në lloto sportive – pasi në pasurinë e deklaruar pohonte se 10 mijë euro i kishte fituar me skedina, është një nga ata që u rrëzua nga vettingu, ku një prej arsyeve qe dhe molepsja pas bixhozit me rezultate ndeshjesh.
Edhe është interesant se si e ka bërë apologjinë e rënies në këtë ves, ku përfshihet dhe pendesa. Është Shqiptarja.com ajo që ka mundur të sigurojë rrëfimin e tij.
“Lidhur me këtë gjetje në relacion më
lejoni të pohoj përpara jush se sot nuk ndihem aspak krenar për atë periudhë
3-vjeçare tashmë të shkuar një herë e mirë prej më se 10 vitesh. Dua të pohoj,
po kështu, para jush se e vërteta është se në atë kohë përfshirja në lojëra
sportive nuk më është dukur si diçka jo etike aq më pak e ndaluar ligjërisht.
Madje edhe ndarja prej saj fillimisht nuk ndodhi si rezultat i ndërhyrjes së
ndonjë faktori të brendshëm apo të jashtëm që më vuri në dukje se po bëja diçka
të gabuar apo të ndaluar. Reflektimi im i vërtetë ndaj papërshtatshmërisë etike
të përfshirjes në atë loje ndodhi vetëm kohët e fundit, pikërisht pas nisjes së
procesit të rivlerësimit kalimtar. Nga ky moment e në vazhdim jam ndjerë vërtet
keq. Edhe pse nuk kisha dhe nuk kam asnjë dyshim rreth integritetit tim moral
dhe profesional, përsëri nuk mund të mos u jepja të drejtë atyre zërave kritik
të publikut. Vura re se sa lehtësisht mund të thyhej e cenohej besimi i
publikut ndaj meje si prokuror madje edhe në kushtet kur më parë ky besim ishte
shfaqur si i palëkundshëm. Për shkak të këtij reflektimi, unë sot para jush nuk
dëshiroj t’ju paraqes ndonjë justifikim për veten për atë që kam kryer në ato 3
vite të para 10 viteve. Nuk dëshiroj të përdor si argument mbrojtës se loja
sportive ishte dhe vazhdon të jetë në fund të fundit një veprimtari e ligjshme
që i lejohet çdo qytetari të thjeshtë.
Për hir të paraqitjes së një argumenti mbrojtës, nëse vërtet mund të quhet i
tillë, mund t’ju them vetëm se kjo ka ndodhur për shkak të ndërgjegjësimit jo
në shkallën e kërkuar që duket se paskam pasur në atë kohë në lidhje efektet e
kësaj sjelljeje. Kjo duket se ka ndodhur edhe për shkak se kam lundruar në të
njëjtin mjedis jo etik i cili ma ka ulur vigjilencën e vetëdijes aq sa e kam
konsideruar sjelljen time si diçka normale të pranuar gjerësisht nga të gjithë.
Por pavarësisht nga këto argumente mbrojtjeje, nëse do të cilësoheshin të
tilla, unë sot nuk ndihem në paqe me veten time për këtë pakujdesi që kam
shfaqur në atë kohë. Ndërkohë konstatoj me të njëjtën keqardhje mungesën e një
reagimi dhe përpjekje nga ligjvënësi apo komuniteti i prokurorëve për të
parashikuar barriera konkrete ligjore apo të karakterit etik, të cilat do të
parandalonin që pjesëmarrja në lojërat sportive të ushqente tek publiku
hamendje apo dyshime rreth integritetit të figurës sonë. Kjo mangësi bën që
ende edhe sot çdo prokuror të jetë i rrezikuar njësoj nga këto paragjykime.
Megjithatë edhe pse e fajësoj veten për këtë sjellje, nga ana tjetër unë jam dhe nuk mund të mos ndihem krenar për integritetin tim profesional të cilin e kam treguar në mënyrë të vazhdueshme në kryerjen e detyrës së prokurorit, duke mos marrë parasysh në asnjë rast shkallën e dëmit personal nga mos bërja kompromis. Këtë fakt mund ta kishte konstatuar edhe vetë DSIK-ja nëse do të kishte analizuar se gjatë gjithë karrierës sime nuk kam pasur pothuajse asnjë rast që palët në proces të kenë shfaqur pretendime ndaj korrektësisë sime në detyrë. Edhe rasti i fundit i iniciuar nga Prokurori i Përgjithshëm rezultoi qartazi se asnjë person nuk arriti të demonstrojë një veprim konkret të kryer nga unë në kundërshtim me detyrën. Po kështu këtë integritet profesional të treguar në vite DSIK-ja mund ta kishte konstatuar edhe duke u bazuar tek mungesa e informacioneve për kontakte apo shoqëri të papërshtatshme me element me precedent kriminal apo të njohur si njerëz të botës së krimit. Këtë mund ta kishte konstatuar DSIK-ja edhe me anë të verifikimit të opinionit që ekziston rreth integritetit tim profesional mes kolegëve me të cilët kam punuar e punoj ose mes drejtuesve me të cilët kam bashkëpunuar në vite. Po kështu integriteti im mund të verifikohej edhe nga përfaqësimi i akuzës në disa procedime penale të njohura ku integriteti im është vënë në provë përballë presionit fizik dhe atij politik. Përmes këtyre përfaqësimeve të akuzës mund të konstatoheshin dy aspekte të rëndësishme të integritetit tim si prokuror”.
Interesant në historinë e ish-prokurorit Artur Selmani, është pikërisht koinçidenca: një njeriu i drejtësisë, me identikitin e një njeriu që bën para, shkon e siguron dhe 10 mijë euro nga llotot sportive. Pra nuk humb por fiton! /tesheshi.com/
