Është dorëzuar vullnetarisht arma e parë, afro një muaj pas apelit të ministrit të Rendit, Saimir Tahiri i cili promovoi një tjetër fazë të mbledhjes së armëve që nga `97-ta kur u rrëmbyen nga depot e ushtrisë.
Siç njofton policia, ai është një 85-vjeçar i cili është paraqitur këto ditë në Komisariatin e Policisë Nr. 4 në kryeqytet dhe ka dorëzuar një automatik. “Më datë 03.12.2016, shtetasi M.Ll, vjeç 85, banues në Tiranë, ka dorëzuar një automatik model 56, dhe një karikator me 25 fishekë”, thuhet në njoftim.
Ministri Tahiri tha se për të gjithë ata që i dorëzojnë armët pa leje vullnetarisht, nuk do të ketë ndjekje penale.
Por dorëzimi i një arme deri më tani është shumë pak. Llogaritet që të jenë ende me mijra në duart e shqiptarëve, ku dhe viktimat prej tyre gjatë gjithë këtyre viteve kanë qenë të shumta. /tesheshi.com/
