Rrjeti Ballkano-Ukrainas (BUCN) u bën thirrje liderëve të vendeve të Ballkanit Perëndimor që të dënojnë mbajtjen e të ashtuquajturave “zgjedhje lokale” në zonat e pushtuara përkohësisht të Ukrainës që kontrollohen nga Rusia, thuhet në deklaratën e këtij organizimi.
Ata theksojnë se Federata Ruse planifikon të mbajë “zgjedhje lokale” më 10 shtator në “rajonet ukrainase të pushtuara përkohësisht” në Donetsk, Zaporozhye, Lugansk dhe Kherson.
Në deklaratën e BUCN thuhet se Shërbimi i Sigurisë së Ukrainës konfirmoi “se javën e kaluar pushtuesit filluan përgatitjet për ‘zgjedhjet’ e parakohshme në disa vendbanime të këtyre territoreve, duke anashkaluar procedurat ligjore të votimit”.
“Ata mbajnë kuti votimi dhe vizitojnë banesat, ndalojnë njerëzit në rrugë, në vende publike”, shtuan ata.
“Forcat pushtuese ruse po i detyrojnë qytetarët e Ukrainës, që jetojnë në territoret e pushtuara përkohësisht, të marrin pjesë në zgjedhje duke përdorur shantazh, frikësim, lëshim të detyruar të pasaportave dhe zëvendësimin e dokumenteve të identifikimit ukrainas me kopje ruse.”
Shkëmbim i detyruar i dokumenteve
Ata theksojnë se autoritetet ruse ftojnë vëzhgues të huaj nga Ballkani që të jenë pjesë e “zgjedhjeve lokale” në territoret e pushtuara përkohësisht, “gjë që konsiderohet e paligjshme, sepse me atë akt bëhen bashkëpunëtorë në krimet e agresorëve”.
“Zgjedhjet në territoret e okupuara përkohësisht të Ukrainës shkelin Kartën e OKB-së, si dhe sovranitetin dhe integritetin territorial të Ukrainës. Prandaj, asnjë organ i zgjedhur i Federatës Ruse (në këto territore) nuk mund të konsiderohet legjitim. Rrjeti ballkano-ukrainas BUCN u bën thirrje liderëve të shteteve ballkanike që të dënojnë veprimet e vendit agresor, të marrin pjesë në vendosjen e sanksioneve ndërkombëtare dhe të kontribuojnë në përgjegjësinë penale të Federatës Ruse për krimet e kryera. /tesheshi.com/
