Javë pasi e pa veten në pozitën e Salvator Aljendes me vetvrasje, presidenti Meta ka lëshuar një tjetër deklaratë, kësaj here me ’97-ën si kujtesë, duke kërkuar nga kahjet politike që mos e përsërisin më.
Kështu është kuptuar mesazhi i tij i dhënë në Durrës, aty ku këtë të dielë ishte për të përkujtuar 80-vjetorin e 7 Prillit, rezistencës antifashite.
“Unë besoj vetëm te dialogu dhe vetëm te zgjidhja politike përmes një dialogu të përgjegjshëm dhe real për të rivendosur normalitetin e plotë kushtetues, institucional dhe demokratik të vendit.
Besoj se pas vitit 1997 vendi ka bërë përparime të rëndësishme dhe i nxis e i inkurajoj të gjithë politikanët e përgjegjshëm kudo ku ata ndodhen, në mazhorancë apo në opozitë, të tregojnë që në këto 22 vite Shqipëria jo vetëm ka bërë përparime, por që edhe këto 22 vite nuk mund të shkojnë dëm për hir të kokëfortësive dhe të demonstrimeve të forcës përmes mitingjeve dhe antimitingjeve të panevojshme”, tha Meta.
Siç mund të vihet re, ai ka tentuar të mbajë ekulibrin kësaj here, si kreu i shtetit, ndërkohë që mazhoranca ka parë te Meta të qënit palë më opozitën përgjatë gjithë zhvillimeve të fundit. /tesheshi.com/
