Donald Trump dhe urdhri i tij ekzekutiv për ndalimin e hyrjes në SHBA të qytetarëve nga shtatë vende me shumicë muslimane morën një tjetër goditje kur një gjykatë federale apeli në San Francisko vendosi të lërë në fuqi vendimin e gjykatës së shkallës së parë për pezullim.
Me një vendim të njëzëshëm, paneli prej tre gjykatësish nuk pranoi ta rivendosë ndalimin për refugjatët dhe udhëtarët nga vendet muslimane. Gjykatësit vunë në dukje se shtetet brenda vendit kishin pretendime serioze për diskriminim fetar.
Pak pas vendimit do të vinte dhe një reagim i parë i presidentit Trump, që dukshëm i nervozuar shkroi me shkronja të mëdha në Twitter: “Shihemi në gjykatë, siguria e kombit tonë është në rrezik!”
Gjykata e Lartë do të jetë ajo që me shumë mundësi do të thotë fjalën e fundit mbi urdhrin ekzekutiv të Trump-it.
Sipas urdhrit ekzekutiv, i cili ndeshi kundërshti të fortë që prej momentit të parë të shpalljes së tij, të gjithë refugjatëve u mohohej hyrja në SHBA për 120 ditë, ndërsa udhëtarëve nga Irani, Iraku, Libia, Somalia, Sudani, Siria dhe Jemeni u ndalohej për 90 ditë kjo hyrje.
Donald Trump u ka deklaruar gazetarëve se administrata e tij do ta fitonte në fund çështjen në proces gjyqësor, duke e quajtur “politik” vendimin për pezullimin e urdhrit ekzekutiv. /tesheshi.com/
