Pas kreut të katolikëve shqiptare, Gjergj Frendo, është dhe Komunitetit Musliman që apelon politikën për zgjidhjen e krizës. Madje në deklaratë përdoret dhe togfjalëshi dramatizues “ulni gjakrat”, referuar qëndrimeve të palëve politike
“Shqipëria është shtet laik dhe ne e respektojmë me rigorozitet këtë nocion, por kjo nuk na le pa përgjegjësi për gjendjen e popullit shqiptar, qofshin besimtarët tanë, të besimeve të ndryshme apo pa besim.
Ne, në këtë Muaj të Shenjtë, më shumë se në çdo muaj tjetër duhet të lutemi për paqe. Ky muaj është muaji i mëshirës, tolerancës dhe reflektimit
I bëjmë thirrje të barabartë forcave të përfshira në këtë situatë tensioni jo të këndshme për vendin tonë, të ulin gjakrat, të ndalin gjuhën e ashpër në diskurin e tyre publik, dhe për të mirën e kombit, mbështetësve të tyre, të ulen të dialogojnë”.
KMSH i kërkon politikës që të marrë shembull nga bashkëjetesa fetare, që dhe ajo një ditë të jetë shembull për shoqërinë.
“Politika të marrë shembull nga harmonia dhe dialogu i feve në Shqipëri, të jenë më shumë bashkëpunues me njëri-tjetrin. Ashtu siç politika krenohet me harmoninë fetare nëpër botë, le të tregojë se di të jetë edhe vetë shembull e përçuese e këtyre vlerave demokratike. Të ulen të gjejnë zgjidhje në dobi të popullit shqiptar.
Ne i bëjmë thirrje popullit shqiptar, në veçanti besimtarëve tanë, në cilën do bindje qofshi, rrini larg dhunës dhe konfliktualitetit. Jini shembull për të tjerët në situata të tilla, kini parasysh porositë e fesë tonë dhe të profetit tonë. Ruani qetësinë, reflektoni, shpërndani paqe midis jush, shpërndani paqe edhe ndaj atyre që kanë mendime të ndryshme nga ju”, thuhet ndër të tjera në deklaratë. /tesheshi.com/
