Rikthehet sërish debati për çeshtjen e përgjimit në vend. Ka qenë ky fokusi i diskutimit në komisionin hetimor parlamentar, për përdorimin nga strukturat e ministrisë së Brendshme dhe Policisë së Shtetit të pajisjes “IMSI CATCHER”.
Komisioni është shoqeruar me debate mes ministrit Tahiri, i thirrur nën cilësinë e dëshmitarit, si dhe kryetarit Flamur Noka. Ky i fundi ka pyetur vazhdimisht ministrin nëse ka dijeni për futjen e kësaj pajisje në Shqipëri, por Tahiri ka preferuar t’i shmanget përgjigjeve konkrete, për t’ju referuar sipas tij Prokurorisë.
“Jeni në dijeni të hyrjes së një pajisjeje të quajtur ‘IMSI Catcher’ në territorin e Republikës së Shqipërisë. Ju lutem përgjigjuni po ose jo”, ka pyetur Noka.
“Unë jam në dijeni për çdo çështje që ka të bëjë me përmbushjen e detyrës sime, në bazë të ligjit. Në qoftë se keni rezerva për përgjigjet e mia, mund të shfrytëzoni hapësirën që ju lejon ligji të bëni dhe kallëzim penal ndaj meje. Jam shumë i gatshëm. Kjo është përgjigja ime”, u shpreh Tahiri.
Noka ka insistuar vazhdimisht për të marrë përgjigjen lidhur me pajsjen e përgjimit, por përgjigja e ministrit të Brendshëm ka qenë vazhdimisht: Në qoftë se s’ju pëlqen mund të më kallëzoni në Prokurori. Unë u përgjigja!”.
Në debat u përfshi edhe deputeti Asllan Dogjani teksa i është referuar deklaratës së ministrit se policia disponon një pajisje të tillë, po sërish Tahiri nuk ka preferuar të përgjigjet, i cili pas 20 minutash i pranishëm në komision është larguar, për të vijuar axhendën e tij./tesheshi.com/
