Agjencitë kryesore perëndimore të lajmeve raportuan sot për zgjedhjet në Serbi, duke thënë se pritet fitorja e presidentit Aleksandar Vuçicc dhe Partisë së tij Progresive Serbe, të cilat kanë përfituar nga lufta në Ukrainë.
Associated Press thekson se sot janë krijuar radhë të gjata para qendrave të votimit në Serbi, por se në pushtet pritet të mbetet një qeveri populiste, e cila refuzoi të vendosë sanksione ndaj Rusisë për shkak të luftës në Ukrainë.
Sondazhet parazgjedhore të opinionit publik parashikojnë se Vuçiç do të fitojë një mandat tjetër pesëvjeçar dhe se Partia e tij Progresive Serbe e krahut të djathtë do të dominojë sërish parlamentin me 250 deputetë, sipas agjencisë amerikane.
Sipas analistëve, megjithatë, opozita ka një shans për të fituar në Beograd, sipas AP, dhe vlerëson se do t’i jepte një goditje të rëndë sundimit të padiskutueshëm një dekadë të populistëve në Serbi.
Opozita kanë thënë se gjatë votimit janë vërejtur parregullsi të shumta dhe se partia në pushtet është e gatshme të përdor dhunë për të penguar fitoren e opozitës, raporton AP.
Agjencia thekson se Vuçiç, një ish-ultranacionalist që mburret për lidhje të ngushta me presidentin rus Vladimir Putin, u përpoq të paraqitej si garantues i stabilitetit në mes të trazirave në Evropë.
AP vlerëson se në vendin, i cili kaloi një seri luftërash në vitet 1990 dhe bombardimet e NATO-s në 1999, frika e një konfliktit tjetër e ndihmoi Vuçiçin.
Megjithëse Serbia aspiron zyrtarisht anëtarësimin në BE, Vuçiç kultivon lidhje të ngushta me Rusinë dhe Kinën, duke llogaritur zemërimin e serbëve në Perëndim për sulmet ajrore të NATO-s, tha AP, duke shtuar se Serbia mbështeti një rezolutë të OKB-së që dënonte pushtimin rus të Ukrainës, por që Beogradi nuk iu bashkua sanksioneve kundër Moskës.
Agjencia AFP shkruan se qytetarët e Serbisë votuan sot në zgjedhjet në të cilat populisti Vuçiç planifikon të zgjasë qeverisjen e tij dhjetëvjeçare, duke u paraqitur si garantues i stabilitetit në hijen e luftës në Ukrainë.
AFP vlerëson se pushtimi rus i Ukrainës ndryshoi rrjedhën e fushatës, e cila në Serbi duhej të kishte në fokus mjedisin, korrupsionin dhe të drejtat.
Por, shtoi ai, i mësuar të luajë midis ndikimeve rivale nga Lindja dhe Perëndimi, Vuçiç përfitoi nga lufta, duke u paraqitur si dikush që largon frikën e destabilitetit dhe si “i vetmi kapiten i aftë për të drejtuar një anije në mot me stuhi”.
AFP vlerëson se vetëm pak muaj më parë, opozita dukej se kishte bërë një hap përpara, duke shtuar se Vuçiç anuloi një projekt të diskutueshëm të minierës së litiumit në janar që ndezi dhjetëra mijëra protestues, një ndryshim që rrallë shihet gjatë sundimit të tij dhjetëvjeçar.
Agjencia shton se opozita shpreson se pjesëmarrja e lartë mund të çojë në raundin e dytë të zgjedhjeve presidenciale, megjithëse sondazhet e fundit parashikojnë se kreu aktual i shtetit, të cilin kritikët e akuzojnë për autoritarizëm, do të kalojë kufirin e 50 për qind.
AFP raporton edhe vlerësimet parazgjedhore të analistëve se opozita ka pak shanse të rrëzojë presidentin ose të prishë përbërjen e parlamentit në largim, i cili është nën kontrollin e Vuçiçit.
Agjencia thekson se disa parti opozitare ndajnë pikëpamjet pro-ruse të Vuçiçit, ndërsa të tjerat nuk guxojnë të flasin nga frika se mos zhgënjejnë votuesit pro-rusë.
Sipas AFP, Vuçiç ka avantazhe të tjera.
Gjatë sundimit të tij të gjatë, ai rriti presionin në të gjitha nivelet e qeverisë, duke përfshirë kontrollin de facto mbi institucionet dhe pothuajse të gjitha mediat, dhe ofroi ndihmë financiare përpara zgjedhjeve, duke shkaktuar kritika për blerjen e votave. /tesheshi.com/
