Associated Press (AP) raportoi se “aleati rus Serbia mori në dorëzim një sistem të sofistikuar kundërajror kinez në një operacion të fshehtë këtë fundjavë, mes shqetësimeve perëndimore se grumbullimi në Ballkan gjatë luftës në Ukrainë mund të kërcënojë paqen e brishtë në rajon”
Mediat dhe ekspertët ushtarakë konfirmuan të dielën se gjashtë aeroplanë transportues kinezë Y-20 u ulën në aeroportin civil të Beogradit, që dyshohet se mbanin sisteme raketore tokë-ajër HK-22 për ushtrinë serbe, raporton AP.
Agjencia shton se aeroplanë mallrash kinezë me shenja ushtarake janë parë në aeroportin “Nikola Tesla” të Beogradit dhe raporton se Ministria e Mbrojtjes së Serbisë nuk iu përgjigj menjëherë kërkesës së AP për koment.
Ekspertët e panë dërgimin e armëve përmes territorit të të paktën dy vendeve anëtare të NATO-s, Turqisë dhe Bullgarisë, si një demonstrim të shtrirjes globale në rritje të Kinës, shkruan AP.
“Shfaqja e Y-20 ishte befasuese sepse ata fluturonin masivisht, ndryshe nga një seri fluturimesh me një avion”, shkruan revista online The Warzone, duke shtuar se prania e Y-20 në Evropë në çdo numër është gjithashtu një fenomen mjaft i ri”.
Analisti ushtarak serb Aleksandar Radiç tha se “kinezët kryen një demonstrim force”.
“Presidenti serb Aleksandar Vuçiq pothuajse ka konfirmuar dorëzimin e sistemit me rreze të mesme të rënë dakord në vitin 2019, duke thënë të shtunën se do të prezantojë ‘krenarinë e fundit’ të ushtrisë serbe të martën ose të mërkurën”, kujton agjencia amerikane.
Vuçiq “u ankua më parë se vendet e NATO-s, të cilat përfaqësojnë shumicën e fqinjëve të Serbisë, refuzojnë të lejojnë fluturimet e atij sistemi (kinez) mbi territorin e tyre për shkak të tensioneve prej agresionit rus në Ukrainë”, sipas AP.
Agjencia shkruan më tej se, “edhe pse Serbia votoi për rezolutat e OKB-së që dënojnë sulmet e përgjakshme ruse në Ukrainë, ajo refuzoi t’i bashkohet sanksioneve ndërkombëtare kundër aleates së saj në Moskë ose te kritikonte drejtpërdrejt krimet e dukshme të kryera atje (në Ukrainë) nga trupat ruse”.
Ngjashmëria me Patriot dhe S-300
“Në vitin 2020, zyrtarët amerikanë paralajmëruan Beogradin që të mos blejë sisteme kundërajrore HK-22. Ata thanë se nëse Serbia vërtet dëshiron të anëtarësohet në Bashkimin Evropian dhe aleancat e tjera perëndimore, duhet të harmonizojë pajisjet e saj ushtarake me standardet perëndimore”, shkruan AP.
Sistemi raketor kinez po krahasohet me sistemin amerikan “Patriot” dhe sistemin rus të raketave tokë-ajër S-300, megjithëse ka një rreze më të shkurtër veprimi, ku theksohet se Serbia do të jetë operatori i parë i raketave kineze në Evropë.
Agjencia amerikane kujton gjithashtu se “Serbia ishte në luftë me fqinjët e saj në vitet 1990”, si dhe se “ajo po kërkon zyrtarisht anëtarësimin në BE dhe tashmë ka forcuar forcat e saj të armatosura me armë ruse dhe kineze, duke përfshirë avionë luftarakë, tanke dhe të tjera pajisje”.
Në vitin 2020, shkruan AP, Serbia mori përsipër dronët “Chengdu Pterodactyl-1”, të njohur në Kinë si “Wing Loong”. Këta dronë luftarakë mund të synojnë bomba dhe raketa dhe mund të përdoren për misione zbulimi.
“Në Perëndim, ekziston frika se armatosja e Serbisë nga Rusia dhe Kina mund të nxisë vendin ballkanik në një luftë të re, veçanërisht kundër ish-provincës së saj të Kosovës, e cila shpalli pavarësinë në vitin 2008. Serbia, Rusia dhe Kina nuk e njohin shtetësinë e Kosovës, ndërsa SHBA dhe shumica e vendeve perëndimore po”, përfundon AP. /tesheshi.com/
