Bashkimi Europian anulon rreth 8 milionë euro për serbët e Mitrovicës së Veriut, pasi ata nuk kanë zbatuar marrëveshjen për integrimin me pjesën tjetër të Kosovës.
Siç njofton zyra e BE, Përfaqësuesja e saj speciale në Kosovë, Nataliya Apostolova, është detyruar të anulojë ndihmën financiare për Mitrovicën e veriut, në vlerë prej 7. 8 milion euro.
Paratë ishin parashikuar të ndahen për ndërtimin e qendrës kulturore dhe objektit të ri të universitetit në Mitrovicën veriore. Siç kanë thënë Zyra e BE-s në Kosovë, autoritetet lokale nuk kanë arritur të largojnë objektet e ndërtuara në mënyrë jolegale dhe të lirojnë hapësirën për fushat e punës.
Kryetari serb i Mitrovicës së Veriut Goran Rakiç ka reaguar ashpër:“ky vendim nuk ka të bëjë me largimin e objekteve, por me çështjen e revitalizimit të urës kryesore mbi lumin Ibër. Ambasadorja Apostolova po luan sipas principit ‘shkopi dhe karota’, me të cilin ne nuk do të pajtohemi.
E dërguara e BE-së, Apostolova, ka qenë e befasuar me insistimin tonë që të na sqarohet se si është e mundur që projekti për revitalizimin e urës të kushtojë 1. 2 milionë euro, ndërkaq mbikëqyrja, të cilën e bën ekipi i saj, kushton 1. 9 milionë euro, gjë që është shumë më tepër”.
/tesheshi.com/
